ہماری منزل ایسا پاکستان ہے جس کا خواب علامہ اقبال اور قائداعظم نے دیکھا تھا، علامہ اقتدار نقوی

شیعیت نیوز: یوم پاکستان کی مناسبت سے منعقدہ تقریب سے خطاب کرتے ہوئےمجلس وحدت مسلمین جنوبی پنجاب کے سیکرٹری جنرل علامہ اقتدار حسین نقوی نے کہا کہ 23مارچ امنگوں اور جذبوں کو سلام پیش کرنے کا دن ہے، یہ تجدید عہد اور قوم میں نئے جذبوں کے رنگ بھرنے کا دن ہے۔

یہ بھی پڑھیں ایسا پاکستان چاہیے جس کے مقاصد کا تعین قائد اعظم محمد علی جناحؒ نےکیا ، علامہ ساجد نقوی

انہوں نے کہا کہ23 مارچ کا دن وطن عزیز پاکستان کا حصول ممکن بنانے والے ہمارے عظیم بزرگوں کو خراج تحسین پیش کرنے کا دن ہے۔ علامہ اقتدار نقوی نے کہا کہ 23مارچ 1940ء وہ دن تھا جب ہندوستان کے مسلمانوں نے عظیم قائد کی رہنمائی میں قرارداد پاس کی جو پاکستان کے حصول کا پیش خیمہ ثابت ہوئی، ہندوستان کے مسلمان سیسہ پلائی دیوار بن گئے اور دن رات ایک کرکے الگ وطن کا حصول ممکن بنایا۔

اُنہوں نے مزید کہا کہ اب ہم سب نے مل کر اس عظیم وطن کی حفاظت، آبیاری اور اس کی ترقی و خوشحالی کیلئے اپنی صلاحیتوں کے جوہر دکھانے ہیں، بانیان پاکستان نے ملک کو ترقی و خوشحالی کی راہ پر گامزن کردیا ہے اور ہماری منزل ایسا پاکستان ہے جس کا خواب ہمارے محسنوں علامہ اقبال، قائداعظم اور ہمارے عظیم بزرگوں نے دیکھا تھا، ہم اسلامی، فلاحی ریاست اور ترقی یافتہ پاکستان کا حصول ممکن بنا کر دم لیں گے۔