امریکی صدر بائیڈن کی ولادیمیر پیوٹن کو قاتل قرار دیتے ہوئے پابندیوں کی دھمکی

شیعیت نیوز: امریکی صدر جو بائیڈن نے روسی ہم منصب ولادیمیر پیوٹن کو قاتل قرار دے دیا۔ دوسری طرف روس نے امریکہ سے اپنے سفیر کو واپس بلالیا۔

امریکی میڈیا کے مطابق صدر بائیڈن نے کہا ہے کہ ولادیمیر پیوٹن کو امریکی انتخابات میں مداخلت کی بھاری قیمت چکانا ہوگی۔

انہوں نے متنبہ کیا کہ اگر مداخلت ثابت ہوگئی تو روس پر پابندیاں عائد کی جائیں گی۔

خیال رہے کہ کہ امریکی انٹیلی جنس رپورٹ میں 2020ء کے صدارتی انتخابات میں روس پر مداخلت کا الزام عائد کیا گیا تھا۔

صدر بائیڈن کا مزید کہنا تھا کہ یکم مئی تک افغانستان سے امریکہ کا فوجی انخلا مشکل ہے۔

واضح رہے کہ چند روز قبل امریکی صدر جو بائیڈن نے دعویٰ کیا تھا کہ امریکہ میں جمہوریت ابھی تک نازک ہے۔

انہوں نے کہا کہ سینیٹ میں ہونے والے حتمی ووٹ نے ٹرمپ کو قصور وار ٹھہراتے ہوئے سزا یافتہ نہیں قرار دیا لیکن الزامات کے متن پر کوئی تنازع نہیں ہے۔

یہ بھی پڑھیں : چین نے امریکی اور جاپانی وزرائے دفاع کے الزامات مسترد کر دیئے

دوسری جانب امریکی انتخاب میں مبینہ روسی مداخلت کے خلاف صدر بائیڈن کے بیان کے بعد روس نے امریکہ سے اپنا سفیر واپس بلا لیا۔

غیر ملکی خبر رساں ادارے کے مطابق امریکی ٹی وی چینل کو انٹرویو دیتے ہوئے صدر بائیڈن نے کہا تھا کہ روسی صدر ولادیمیر پیوٹن کو امریکی انتخابات میں مداخلت کی قیمت چکانا ہوگی۔

انہوں نے اس امریکی انٹیلی جینس رپورٹ پر پوچھے گئے سوال کے جواب میں یہ کہا تھا، جس میں روس اور ایران پر امریکی الیکشن میں مداخلت کے الزامات عائد کیے گئے ہیں۔

اس حوالے روس کے دفتر خارجہ نے اپنے بیان میں کہا ہے کہ اناتولی اینتونوو کو روس امریکہ تعلقات کے مستقبل سے متعلق مشاورت کے لیے ماسکو طلب کیا گیا ہے۔

بیان میں کہا گیا ہے کہ یہ اقدام دونوں ممالک کے باہمی تعلقات کو ناقابل تلافی نقصان پہنچنے سے بچانے کے لیے کیا جا رہا ہے۔