فلسطینی تنظیم جہاد اسلامی کے سابق سکریٹری جنرل رمضان عبداللہ شلح کا انتقال ہوگیا

شیعت نیوز : فلسطین کی اسلامی جہاد کے سابق سیکرٹری جنرل رمضان عبداللہ شلح طویل علالت کے بعد 62 سال کی عمر میں بیروت میں انتقال کرگئے۔

لبنان کے المنار ٹی وی چینل کے مطابق رمضان عبداللہ شلح کئی سال قبل علالت کا شکار ہوئے اور تنظیمی ذمہ داریوں سے سبکدوش ہوگئے تھے۔ ان کا لبنان کے مختلف اسپتالوں میں علاج کیا گیا۔

اسلامی جہاد کی طرف سے جاری ایک بیان میں جماعت کے سابق سیکرٹری جنرل کی وفات کی تصدیق کرتے ہوئے ان کی وفات پر گہرے دکھ اور افسوس کا اظہار کیا۔ بیان میں مرحوم کی فلسطینی کاز، مسلح تحریک آزادی، مزاحمت اور قابض اسرائیل کے خلاف دلیرانہ خدمات پر خراج عقیدت پیش کیا اور کہا کہ رمضان عبداللہ شلح نے 20 سال تک اسلامی جہاد میں گراں قدر خدمات انجام دیں۔

یہ بھی پڑھیں : فلسطینی علاقوں کا اسرائیل سے الحاق جنگی جرم تصور کیا جائے گا۔ عرب لیگ

خیال رہے کہ عبداللہ شلح کو سنہ 1995ء میں اسلامی جہاد کا سیکرٹری جنرل مقررکیا گیا۔ ان کی تقرری اسلامی جہاد کے بانی فتحی الشقاقی کی اسرائیلی حملے میں شہادت کے بعد جماعت کا سیکرٹری جنرل مقرر کیا گیا۔

رمضان عبداللہ الشلح 1958 کو پیدا ہوئے اور سنہ 1981ء میں مصر کی الزقازیق یونیورسٹی سے فراغت حاصل کی اور غزہ کی پٹی میں اسلامی یونیورسٹی میں اکنامک کالج میں بہ طور استاد خدمات انجام دیں۔وہ انگریزی اور عبری زبان پر مسلط تھے وہ جنوبی فلوریڈا کی یونیورسٹی میں 1993 سے 1995 تک استاد بھی رہے تھے۔

دوسری جانب حماس کے سیاسی شعبے کے سربراہ اسماعیل ھنیہ نے اسلامی جہاد کے سیکرٹری جنرل رمضان عبداللہ شلح کے انتقال پر گہرے دکھ کا اظہار کرتے ہوئے کہا ہے کہ شلح کی وفات سے پوری فلسطینی قوم اس وقت شدید صدمے سے دوچار ہے۔

انہوں نے رمضان شلح کی خدمات کو خراج عقیدت پیش کرتے ہوئے کہا کہ فلسطینی قوم آج ایک عظیم مجاہد، لیڈر اور محب وطن مزاحمتی قائد سے محروم ہوگئی ہے۔ دکھ کی اس گھڑی میں حماس کی قیادت اور کارکن اسلامی جہاد کےساتھ کھڑے ہیں۔

ان کا کہنا تھا کہ ابو عبداللہ رمضان شلح نے زندگی کا ایک بڑا حصہ تحریک آزادی فلسطین، مزاحمت، جہاد اور تدریس میں گذارا، وہ بہترین بھائی، دوست، لیڈر اور محب وطن رہنما تھے۔ آج فلسطینی قوم ایک عظیم لیڈر سے محروم ہوگئی ہے۔