غزہ میں فلسطینی مزاحمت کاروں نے صیہونی جاسوس ڈرون تباہ کر دیا

شیعت نیوز: فلسطین کے علاقے غزہ کی پٹی میں فلسطینی مزاحمت کاروں نے اسرائیل کا ایک بغیر پائلٹ جاسوس ڈرون طیارہ مار گرایا۔

رپورٹ کے مطابق فلسطینی مزاحمت کاروں نے مشرقی دیر البلح میں اسرائیل کے ایک ڈرون طیارے کا تعاقب کرکے اسے فائرنگ کرکے مار گرایا۔

خیال رہے کہ حالیہ عرصے کے دوران اسرائیل کے غزہ کی پٹی کی فضا میں جنگی طیاروں اور ڈرون طیاروں کی پروازوں میں غیرمعمولی اضافہ دیکھنے میں آیا ہے۔

یہ بھی پڑھیں : نیا اسرائیلی قانون، فلسطینی اسراء و شہداء کے خاندانوں کے ساتھ لین دین قانونی جرم

اسرائیلی فوج کے ترجمان کا کہنا ہے کہ گذشتہ شب غزہ کی پٹی کی سرحد پر اسرائیلی فوج نے مشقیں شروع کی تھیں۔ یہ مشقیں روٹین کا حصہ ہیں تاہم چند گھنٹے جاری رہنے والی مشقیں بعد ازاں ختم کردی گئی تھیں۔

دوسری جانب فلسطین کے مقامی  ذرائع کے مطابق منگل کو اسرائیلی فوج نے فلسطینی شہید مصباح ابو صبیح کی بیوہ کو تفتیش کے لیے حراستی مرکز میں طلب کیا ہے۔

تفصیلات کے مطابق اسرائیلی حکام کی طرف سے شہید ابو صبیح کی بیوہ کو المسکوبیہ حراستی مرکز کے کمرہ نمبرچار میں پیش ہونے کو کہا گیا ہے۔

خیال رہے کہ ’’المسکوبیہ‘‘ نامی حراستی مرکز کو فلسطینی شہریوں کو تفتیش کے لیے استعمال کیا جاتا ہے۔اس حراستی مرکز میں لائے جانے والے فلسطینیوں کو بدترین جسمانی اور نفسیاتی تشدد سے گذرا جاتا ہے۔

قبل ازیں اسرائیلی فوج نے شہید ابو صبیح کے بیٹے صبیح کو 13 اپریل کو حراست میں لے لیا تھا۔

اسرائیلی فوج نے وسط اگست 2018ء کو صباح ابو صبیح کو گرفتار کرکے فوجی عدالت سے 13 ماہ قید اور بھاری جرمانہ کی سزا دلوائی تھی۔

مصباح ابو صبیح کو اسرائیلی فوج نے اکتوبر 2016ء کو القدس میں الشیخ جراح کالونی میں ایک یہودی آباد کار کوقتل اور دو کو زخمی کرنے کے الزام میں گولیاں مار کر شہید کردیا تھا۔