عید مبعث کے موقع پردنیا بھرمیں جشن و سرور

شیعت نیوز: رحمت للعالمین ختم المرسلین حضرت محمد مصطفیٰ صلی اللہ علیہ والہ وسلم کی عید مبعث کی آمد پر پورا عالم اسلام جشن و سرور میں ڈوبا ہوا ہے۔

اسلامی ممالک کے تمام چھوٹے بڑے شہروں میں مذہبی مقامات، مساجد اور امام بارگاہوں میں جشن عید مبعث جاری ہے اور نوجوان بچے سڑکوں پر جگہ جگہ اسٹال لگا کر مومنین کرام کو شربت اور مٹھائیاں تقسیم کر رہے ہیں۔

یہ بھی پڑھیں : نئے ہجری شمسی سال کے آغاز پر رہبر انقلاب اسلامی کا ملت ایران کے نام پیغام

ہجرت سے تیرہ سال قبل ستائس رجب المرجب کو جس وقت رحمت للعالمین مرسل اعظم حضرت محمد مصطفیٰ صلی اللہ علیہ والہ وسلم چالیس برس کے ہوئے، تو خلاق کائنات نے اپنے محبوب کو اپنے آخری پیغمبر کے طور پر چننے اور آپ کو درجہ نبوت عطا کرنے کا فیصلہ کیا۔ محبوب کبریا مکہ کی غار حرا میں محو عبادت تھے کہ اچانک فرشتہ وحی کی صدائے اقرا غار میں گونجی اور یوں وحی الٰہی کے سائے میں آخری نبوت کا آغاز ہوا۔

مرسل اعظم صلی اللہ علیہ والہ و سلم نے وحی الٰہی کا آغاز ہوتے ہی عالم بشریت کی ہدایت و رہنمائی کا بیڑا اٹھایا اور حیات طیبہ کے حصول کے لئے اسلام کے نام سے موسوم وہ خطوط عالم بشریت کے حوالے کئے جو رہتی دنیا تک انسانی سعادت کے ضامن قرار پائے۔ محبوب خدا نے عالم انسانیت کو وہ ضابطہ حیات عطا کیا کہ جس کے سائے میں بشریت کمال و انسانیت کی معراج کو با آسانی پا سکتی ہے۔

واضح رہے کہ عید مبعث اس دن کو کہا جاتا ہے جس دن حضرت محمدؐ رسالت پر مبعوث ہوئے،اسلامی عقائد و روایات کے مطابق ستائیس رجب المرجب حضرت محمد مصطفے صل اللہ علیہ وآلہ وسلم کو خداوندعالم نے رسالت کے لئے مبعوث کیا۔