پاک فوج کی جانب سے دفاعی اخراجات میں کمی کے فیصلے کو سراہتے ہیں، عمران خان

شیعیت نیوز: وزیراعظم عمران خان نے پاک فوج کی جانب سے آئندہ مالی سال کے لیے دفاعی اخراجات میں رضاکارانہ کمی کے فیصلے کو سراہتے ہوئے کہا ہے کہ اس بچت کو بلوچستان اور قبائلی اضلاع میں خرچ کریں گے۔

سماجی رابطے کی ویب سائٹ ٹویٹر میں اپنے پیغام میں وزیراعظم عمران خان نے کہا کہ ہماری قومی سلامتی کو درپیش گوناں گوں چیلنجز کے باوجود افوجِ پاکستان کا آئندہ مالی سال کے دفاعی اخراجات میں رضاکارانہ طور پر کمی کا فیصلہ قابل تحسین ہے۔

انہوں نے کہا کہ اس بچت کے نتیجے میں میسر آنے والا سرمایہ خیبر پختونخوا میں ضم ہونے والے قبائلی اضلاع اور بلوچستان کی تعمیر و ترقی میں صرف کیا جائے گا۔ قبل ازیں رواں برس فروری میں وفاقی حکومت نے دفاعی بجٹ میں کسی قسم کی کٹوتی نہ کرنے کا فیصلہ کیا تھا۔

فواد چوہدری نے اپنے بیان میں کہا تھا کہ ملک کا دفاعی بجٹ خطے کے دیگر ممالک کے مقابلے میں پہلے ہی بہت کم ہے اس لیے اضافہ ہونا چاہیے۔

یاد رہے کہ گذشتہ برس پاکستان مسلم لیگ (ن) کی حکومت نے مالی سال 19-2018 کے بجٹ میں دفاع کے لیے 2017ء کے مقابلے میں 19.5 فیصد اضافہ کرتے ہوئے 11 کھرب (1100 ارب) روپے مختص کیے تھے۔

مسلم لیگ (ن) کی حکومت اس سے قبل مالی سال 18-2017 کے لیے دفاعی بجٹ میں 9 کھرب 20 ارب (920 ارب) روپے مختص کر دیئے تھے، جو پہلے سال کے مقابلے میں 7 فیصد اضافہ تھا، جو بڑھ کر گذشتہ برس 1100 ارب روپے تک پہنچ گیا تھا۔

مالی سال 17-2016 کے بجٹ میں 2015ء کے مقابلے میں دفاع کے لیے 10 اعشاریہ 9 فیصد اضافہ کرتے ہوئے 860 ارب روپے مختص کیے گئے تھے۔