وزیرمملکت برائے داخلہ شہریارآفریدی کا کالعدم تنظیموں کو انتخابات میں حصہ لینےسے روکنے کیلئےمیکانزم ترتیب دینے کا عندیہ

شیعیت نیوز: وزیر مملکت برائے داخلہ شہریار آفریدی نے کالعدم تنظیموں کے رہنماؤں کو انتخابات میں حصہ لینے سے روکنے کیلئے موثر میکانزم ترتیب دینے کا عندیہ دیدیا۔ تفصیلات کے مطابق کوہاٹ گیریژن میں بہار فیسٹیول کے اختتام پر صحافیوں سے گفتگو کرتے ہوئے ان کا کہنا تھا کہ جو کچھ ماضی میں ہوتا رہا اسے جاری رکھنے کی اجازت نہیں دی جائے گی۔ انہوں نے یہ بات اس سوال کا جوب دیتے ہوئے کہی جس میں کہا گیا تھا کہ کیا فورتھ شیڈول میں شامل افراد کو حج و عمرہ کیلئے جانے سے روکنے اور کالعدم تنظیموں کے سربراہان کو انتخابات میں حصہ لینے سے روکنے کیلئے کوئی میکانزم ترتیب دیا جارہا ہے۔ وزیر مملکت نے ایک مرتبہ پھر یہ بات دہرائی کہ کالعدم تنظیموں کے خلاف جاری کریک ڈاؤن کسی بیرونی دباؤ پر شروع نہیں کیا گیا، ان کا کہنا تھا کہ حکومت نے پاکستان کو ایسا ملک بنانے کا تہیہ کیا ہوا ہے جس کی طرف کوئی انگلی نہ اٹھا سکے۔

انہوں نے بتایا کہ حکومت نے کالعدم تنظیموں سے تعلق رکھنے والے تمام مذہبی مدارس، ایمبولینسز، ڈسپینسریز، ہسپتال اور دیگر منسلک اثاثہ جات اپنی تحویل میں لے لئے ہیں اور ان کو چلانے کیلئے فنڈز بھی جاری کردیئے ہیں۔ اس کے علاوہ پاکستان کی جانب سے فنانشل ٹاسک فورس (ایف اے ٹی ایف) میں جمع کروائی گئی رپورٹ کی طرف اشارہ کرتے ہوئے انہوں نے اس بات کو خرج ازامکان قرار دیا کہ پاکستان کو بلیک لسٹ کیا جاسکتا ہے۔ شہریار آفریدی کا کہنا تھا کہ اس سلسلے میں حکومت نے آخری رپورٹ ایف اے ٹی ایف میں جمع کروا دی ہے اور جس پیشہ وارانہ انداز میں اس کیس کی پیروی کی ہے اس میں بھارت کے علاوہ تمام ریاستوں نے بہتری کا اعتراف کرتے ہوئے پاکستانی کوششوں کو سراہا۔ ان کا کہنا تھا کہ ماضی میں جب بھی ایف اے ٹی ایف کا وفد ملک میں آیا تو پاکستان کا کیس کمزور ہوا کرتا تھا کیوں کہ تمام اداروں کی آراء مختلف ہوتی تھی لیکن اب ایسا نہیں ہے۔

ان کا کہنا تھا کہ وفاقی تحقیقاتی ادارے (ایف آئی اے) اور دیگر اداروں نے انسانی اسمگلنگ اور منی لانڈرنگ کی روک تھام کیلئے مثالی اقدامات اٹھائے ہیں۔ انہوں نے کہا کہ ایئرپورٹ سکیورٹی فورس، ایف آئی اے، کوسٹ گارڈز، رینجرز، ایف سی اور پاک فوج نے رقم کی غیر قانونی منتقلی، انسانی اور منشیات اسمگلنگ روکنے کیلئے موثر طریقہ کار وضع کئے ہیں۔ وزیر مملکت کا مزید کہنا تھا کہ ہم ہمسایہ ممالک کے ساتھ اپنی سرحدوں پر باڑ لگا رہے ہیں جس کا مقصد دنیا کو یہ پیغام دینا ہے کہ پاکستان اپنی سرزمین کسی ملک کے خلاف استعمال کرنے کی اجازت نہیں دے گا۔ انہوں نے یہ بھی بتایا کہ وزیراعظم اور آرمی چیف دونوں اس کام کی نگرانی کررہے ہیں اس کے ساتھ انہوں نے امید ظاہر کی کہ ترکی اور برطانیہ کے ساتھ مجرمان کی حوالگی کے معاہدے جلد ہو جائیں گے۔