پاک فوج نے عالمی برادری کےسامنے بھارتی جھوٹ بے نقاب کردیا

شیعیت نیوز: بھارتی جھوٹ کو بے نقاب کرنے کیلئے پاک فوج نے عالمی ذرائع ابلاغ کے نمائندوں، مختلف ممالک کے دفاعی اتاشیز اور سفرا کو بالاکوٹ کے قریبی علاقے جابہ میں اس مقام کا دورہ کروایا جہاں بھارتی طیاروں نے بھاگتے ہوئے ’پے لوڈ‘ گرایا تھااور یہ دعویٰ کیا تھا کہ بھارتی فضائیہ نے جابہ کے علاقے میں دہشت گردوں کے مراکز کو نشانہ بنایاہے۔ آئی ایس پی آر کے مطابق انٹرنیشنل میڈیا کے غیر ملکی صحافیوں، مختلف ممالک کے دفاعی اتاشیز اور سفرا پر مشتمل گروپ کو جابہ کے ان مقامات کا دورہ کرایا جنہیں 26 فروری کو بھارت نے کالعدم تنظیم کا ’ٹریننگ کیمپ‘ تباہ کرنے کا جھوٹا دعویٰ کیا تھا، گروپ کو بھارت کے باربار کے جھوٹ اور اس کے برعکس زمینی حقائق سے آگاہ کیا جبکہ ڈی جی آئی ایس پی آر میجر جنرل آصف غفور نے بھارتی دعوے اور زمینی حقائق پر بریف کیا۔ گروپ نے قریب واقعہ مدرسہ کا بھی دورہ کیا جسے بھارت نے تباہ کرنے اور دہشت گردوں کی ہلاکت کادعویٰ کیا تھا، دورے میں شامل افراد نے آزادانہ طور پر وہاں مدرسے میں موجود طلبہ اور اساتذہ سے گفتگو کی اور ان سے سوالات کیے۔