نیوزی لینڈ میں مساجد پر حملے مذاہب کو آپس میں لڑانے کی امریکی اور اسرائیلی ساز ش ہے،علامہ قاضی نیازحسین نقوی

شیعیت نیوز:  وفاق المدارس الشیعہ پاکستان اور ملی یکجہتی کونسل کے مرکزی نائب صدر علامہ قاضی نیاز حسین نقوی نےلاہور میں علماءکے وفد سے گفتگو کے دوران  نیوزی لینڈ اور یمن میں مساجد پر حملوں کی شدید مذمت کرتے ہوئے کہا ہے کہ دہشتگردی عالمی مسئلہ بن چکا ہے، اس طرف توجہ نہ دی گئی تو پوری دنیا میں بدامنی کا راج ہوگا۔ مسجد اللہ کا گھر ہے جہاں خالق کائنات کی عبادت کیساتھ لوگوں کی تربیت کا بھی اہتمام ہوتا ہے، اسلام امن کا داعی ہے جس نے کسی بھی مذہب کیخلاف دہشتگردی یا نفرت کا اظہار نہیں کیا اسلام نے ہمیشہ تحمل اور برداشت کا درس دیا ہے، پیغمبر اکرم کے دور میں مسلمانوں کے یہودیوں اور مسیحیوں کیساتھ اچھے تعلقات رہے ہیں۔ ان کا کہنا تھا کہ دہشتگردی پھیلانے والے استعماری ایجنٹ ہیں، نیوزی لینڈ جیسے پر امن ملک میں دہشتگردی کا ہونا واضح کرتا ہے کہ یہ منصوبہ بندی کے تحت مذاہب کو آپس میں لڑانے کی سازش کی جا رہی ہے، جس کے پیچھے امریکی اور اسرائیلی ایجنسیاں ہیں۔

علامہ قاضی نیاز نقوی نے کہا کہ اسلام کے ماننے والے دہشتگرد نہیں ہو سکتے، اسی طرح امید کرتے ہیں کہ مسیحی قیادت بھی دہشت گردوں سے برات کا اظہار کرے گی۔ انہوں نے کہا ہے کہ یمن میں دہشت گردی پھیلانے والے کون ہیں ؟ مسجدوں پر حملے کرنے والے مسلمان نہیں ہوسکتے۔ اللہ تعالیٰ کے گھر پر حملہ اور معصوم لوگوں کی جانیں لینے والے ظالم کسی رعایت کے مستحق نہیں ۔ان کے خلاف بھرپور کارروائی کی جائے۔بدامنی کے حالات کے پیش نظر او آئی سی اور اقوام متحدہ کو ان دونوں واقعات کا نوٹس لینا چاہیے۔