ایم ڈبلیو ایم کے سربراہ کی سینیٹ کے نو منتخب چیئرمن اور ڈپٹی چیئرمن کو مبارک باد

شیعیت نیوز: مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے سینیٹ کے نومنتخب چیئرمین صادق سنجرانی اور ڈپٹی چیئرمین سلیم مانڈوی والا کو مبارکباد دی ہے۔ انہوں نے کہا کہ مستحکم جمہوریت کے لیے پارلیمنٹ کی بالادستی انتہائی ضروری ہے۔ تمام آئینی اداروں کو اپنی اپنی حدود میں رہتے ہوئے ملک کی ترقی و استحکام کے لیے ذمہ دارانہ کردار ادا کرنا ہوگا۔ انہوں نے کہا نومنتخب چیئرمین سینیٹ پر اراکین کی جانب سے اعتماد کا اظہار ان کی صلاحیتوں کا اعتراف ہے۔ یہ اعتماد قائم رہنا چاہیے۔ انہوں نے کہا کہ عدل و انصاف کے حصول اور قانون کی حاکمیت سمیت مختلف امور میں پاکستان کے عوام سنگین مشکلات کا شکار ہیں۔ ان مشکلات سے چھٹکارا ضروری قانون سازی کے بغیر ممکن نہیں۔

سربراہ ایم ڈبلیو ایم کا کہنا تھا کہ پارلیمنٹ کا مقصد صرف سیاسی شخصیات و جماعتوں کو تحفظ فراہم کرنا نہیں بلکہ عوام کو ان کے حقوق دلانے کے لیے ضرورت اور وقت کے تقاضوں کے مطابق قوانین کا اجرا بھی ہے۔ انہوں نے امید ظاہر کی ہے کہ نومنتخب اراکین ملک و قوم کی ترقی کو مقدم رکھتے ہوئے پارلیمنٹ کی ساکھ پر کوئی آنچ نہیں آنے دیں گے۔ علامہ راجہ ناصر عباس جعفری نے سیاسی جماعتوں کے قائدین پر جوتا اچھالنے کے عمل کو غیراخلاقی قرار دیتے ہوئے کہا ہے کہ سیاسی قائدین سے نظریاتی اختلافات کا مطلب یہ ہرگز نہیں کہ جلسے، جلوس یا مختلف تقاریب میں انہیں اس طرح تضحیک کا نشانہ بنایا جائے۔ یہ عمل جمہوری روایت کے منافی ہے جو کسی بھی سیاسی کارکن کا شعار نہیں ہو سکتا۔

علامہ ناصر عباس نے کہا کہ مخالفین پر جوتے پھینکنے کے عمل پر تالیاں بجانے کی بجائے مذمت کی جانی چاہیے۔ ایسی کسی بھی روایت کی جمہوری و سیاسی عمل میں کوئی گنجائش نہیں۔ انہوں نے کہا کہ عوام کے پاس ووٹ کی طاقت ہے اس کا درست استعمال کرکے وہ اپنی پسندیدگی و ناپسندیدگی کا اظہار کریں۔ آئینی اور اخلاقی طور پر اظہار رائے کا یہی طریقہ عوام کے شایان شان ہے۔