امریکی قیادت کے بیانات پاکستانی قوم دہا ئیوں سے دی جانیوالی قربانیوں کی نفی ہیں، قومی سلامتی کمیٹی

شیعیت نیوز: قومی سلامتی کمیٹی نے امریکی صدرڈونلڈ ٹرمپ کے پاکستان مخالف بیان پر سخت مایوسی کا اظہار کرتے ہوئے کہا ہے کہ پاکستان امریکی صدر کے الزامات کے باوجود جلد بازی میں کوئی قدم نہیں اٹھائے گا، پاکستان کو افغانستان میں مشترکہ ناکامی کا ذمہ دار قرار نہیں دیا جاسکتا، اپنے وطن کی حفاظت کرنا جانتےہیں، پاکستان نے دہشتگردی کیخلاف غیر متزلزل جنگ لڑی، خطےسے القاعدہ کا خاتمہ کیا، اتحادیوں پر الزام لگا کر افغانستان میں امن قائم نہیں کیا جاسکتا۔دوسری جانب آرمی چیف جنرل قمر جاوید باجوہ کی زیر صدارت 207ویں کور کمانڈر کانفرنس جی ایچ کیو میں منعقد ہوئی جس میں سیکیورٹی صورتحال پر غور کیا گیا۔ منگل کو وزیراعظم شاہد خاقان عباسی کی صد ار ت میں قومی سلامتی کمیٹی کا اہم اجلاس ہوا جس میں وزیر داخلہ احسن اقبال، وزیر خارجہ خواجہ آصف ، وزیر دفاع خرم دستگیر، چیئرمین جوائنٹ چیف آف اسٹاف کمیٹی جنرل زبیر محمود حیات، آرمی چیف جنرل قمر جاوید باجوہ، پاک فضائیہ کے سربراہ ایئر چیف مارشل سہیل امان اور پاکستان نیوی کے سربراہ ایڈمرل ظفر محمود عباسی سمیت مشیر خزانہ مفتاح اسمٰعیل اور امریکا میں پاکستانی سفیر اعزاز احمد چوہدری شریک ہوئے ،پاکستانی سفیر کو اجلاس میں شرکت کیلئے خصوصی طورپر بلایا گیا، اجلاس میں ٹرمپ کے بیان، علاقائی صورتحال اور اہم امور پر مشاورت کی گئی۔ اجلاس کے بعد جاری کئے گئے اعلامیے کے مطابق افغانستان میں سیاسی محاذ آرائی، کرپشن اور منشیات بڑے چیلنجز ہیں، افغانستان میں حکومتی عملدراری کے باہر علاقے بین الا قو امی دہشت گردوں کی پناہ گاہوں سے بھرے ہیں، ان پناہ گاہوں سے ہمسائیہ ممالک سمیت پورے خطے کو خطرات ہیں تاہم پاکستان افغان قیادت میں امن عمل کی مکمل حمایت کرتا ہے، پاکستانی اپنے قومی تشخص کو برقرار رکھنا اور اپنے وطن کی حفاظت کرنا جانتی ہے، باہمی اعتماد کے ساتھ ہی آگے بڑھنے سے افغانستان میں پائیدار ومستحکم امن قائم ہوسکتا ہے، پور ے خطے کے امن واستحکام کیلئے کام کرتے رہیں گے، امریکی صدر کی جنوبی ایشیاء پالیسی کے اعلان کے بعد امریکی حکام سے ملاقاتیں ہوئیں ان ملاقاتوں میں کہا گیا کہ باہمی اعتماد سازی کے ساتھ آگے بڑھنا ہی بہترین آراستہ ہے، پاکستان نے دہشت گردی کیخلاف غیر متزلزل جنگ لڑی ہے، تمام دہشت گرد گروپوں کیخلاف بلا امتیاز کارروائی کی، عالمی اتحاد کی افغانستان میں دہشت گردی کیخلاف آج بھی بھرپور مدد کررہے ہیں۔ کمیٹی نے کہا کہ پاکستان کے انسداد دہشت گردی آپریشن سے خطے میں القاعدہ کا خاتمہ کردیا گیا، دہشت گردی کیخلاف تعاون کا نتیجہ ہے کہ پاکستان آج بھی نتائج بھگت رہا ہے، پاکستان نے دہشتگردی کیخلاف جنگ اپنے وسائل اور معیشت کی قیمت پر لڑی، ہزاروں قربانیوں اور شہداء کے خاندانوں کے درد کا کوئی اندازہ تک نہیں کر سکتا۔ بیان میں کہا گیا کہ امریکی قیادت کے حالیہ بیانات حقائق کی نفی کرتے ہیں،امریکی قیادت کے بیانات پاکستانی قوم دہا ئیوں سے دی جانیوالی قربانیوں کی نفی ہیں، امریکی قیادت کے بیانات دونوں ممالک کے درمیان اعتماد کیلئے دھچکا ہیں۔ دوسری جانب منگل کو پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ کی زیر صدارت 207ویں کور کمانڈر کانفرنس جی ایچ کیو میں منعقد ہوئی،کانفرنس میں جیو اسٹریٹجک ماحول کو فروغ دینے اور ملکی اندرونی سیکیورٹی صورتحال کاجائزہ لیاگیا۔ آئی ایس پی آر کے مطابق فورم نے نیشنل سیکورٹی کانفرنس سے متعلق بھی اپنے نقطہ نظر کا اظہار کیا۔