16 نومبر تک سید ناصرعباس شیرازی کو پیش نہ کیا گیا تو ہم سخت اقدام اُٹھائیں گے۔ علامہ احمد اقبال رضوی

شیعت نیوز: مجلس وحدت مسلمین پنجاب کے صوبائی سیکرٹریٹ میں شیعہ تنظیموں ،وفاق المدارس شیعہ پاکستان،مدارس دینیہ،علمائے امامیہ،بانیان مجالس،عزاداران کا مشترکہ اجلاس منعقد ہوا جس میں علامہ مشتاق جعفری،علامہ وقارالحسنین نقوی،علامہ غلام عباس جعفری،علامہ زین نقوی،سردار ابوذر بخاری،سمیت دیگر رہنماوں نے شرکت کی۔ اجلاس کے بعد مجلس وحدت مسلمین پاکستان کے مرکزی رہنما علامہ احمداقبال رضوی نے دیگر رہنماوں کے ہمراہ پریس کانفرنس سے خطاب کرتے ہوئے کہا ہے کہ مجلس وحدت مسلمین پاکستان کے مرکزی ڈپٹی سیکرٹری جنرل سید ناصر عباس شیرازی لاہور سے اغواء ہوئے دو ہفتے ہونے کوہیں،پنجاب کی نااہل حکومت جو اس واقعے کی ذمہ دار ہے،ابھی تک ٹس سے مس نہیں ہوئی۔ انہون نے کہا کہ سانحہ ماڈل ٹاون کے بعد پنجاب حکومت بے خوف ہو چکی ہے،کیونکہ یہاں جس کی لاٹھی اس کی بھینس کا قانون نافذ ہے۔ علامہ احمد اقبال نے کہا کہ ناصر شیرازی کے اغواء کیخلاف ایف آئی آر کے اندراج سے لاہور پولیس انکاری ہے کیونکہ یہ ریاست کے نہیں آلِ شریف کے خدمتگار ہیں۔اعلیٰ عدلیہ کے نوٹس پر بھی پنجاب حکومت حرکت میں نہ آسکی،ہم حیران ہیں کہ ایک پرامن محب وطن شہری اور ایک سیاسی مذہبی جماعت کے رہنما کے اغوا پر تمام ادارے خاموش تماشائی کا کردار ادا کر رہے ہیں۔ انہوں نے کہا کہ آخر عوام کا کیا قصور ہے؟،کیا ہمیں اس بات کی سزا دی جارہی ہے کہ ہم نے ہزاروں لاشے اُٹھائے لیکن ملکی سلامتی و استحکام کے خاطر وطن دشمنوں کے ناپاک عزائم کو کامیاب نہ ہونے دیا۔گلگت بلتستان سے لیکر کوئٹہ تک شناخت کر کے ہمارا قتل عام کیا گیا ،لیکن ہم نے ملکی سلامتی پر آنچ تک نہ آ نے دی۔ علامہ احمد اقبال رضوی نے کہا کہ اب ہمیں ہمارے صبر اور حب الوطنی کا صلہ یوں صلہ دیا جا رہا ہے کہ ہمارے قاتلوں اور ان کے سرپرستوں کوپنجاب کے ایوانوں میں پہنچایا جارہا ہے اور بانیانِ پاکستان کے باوفا بیٹوں کو پابند سلاسل اور نادیدہ قوتوں کے ہاتھوں غائب کیا جا رہا ہے۔انہوں نے کہا کہ آج یہ بات ہماری مرکزی شخصیات تک پہنچ چکی ہے،ہم اس بربریت کیخلاف خاموش نہیں رہیں گے۔ علامہ احمد اقبال رضوی نے کہا کہ اگر 16 نومبر تک سید ناصرعباس شیرازی کو پیش نہ کیا گیا تو ہم سخت اقدام اُٹھائیں گےاور پاکستان بھر سے لوگوں کو لاہور بلائیں گےاور نام نہاد خادم اعلیٰ اور پنجاب کے قاتل وزیر قانون رانا ثنا اللہ کی ظلم و بربریت کیخلاف وزیر اعلیٰ ہاوس کا گھیراو کریں گے۔ انہوں نے کہا کہ انشااللہ ہمارے اس احتجاج میں پوری ملت جعفریہ کی حمایت ہمیں حاصل ہے۔ تمام شیعہ تنظیموں،وفاق المدارس شیعہ،مدارس امامیہ ،بانیاں مجالس ،عزاداران اور شیعہ عمائدین کی اس پریس کانفرنس میں شرکت اس بات کی غمازی ہے کہ ہم اس ظلم و بربریت کیخلاف یک جان ہو کر میدان میں نکلیں گے۔