پاناما لیکس کی تباہی کے بعد پیراڈائز پیپرز کا ہنگامہ
پاناما لیکس کے بعد پیراڈائزلیکس کے نام سے آئی سی آئی جے نے ایک اور بڑا دھماکہ کردیا ، پیراڈائزلیکس میں دنیا کے 47 ممالک کے 127 نمایاں افراد کے نام شامل ہیں۔
شیعت نیوز کو موصول ہونے والی اطلاعات کے مطابق انٹرنیشنل کنسورشیم آف انوسٹی گیشن جرنلسٹس (آئی سی آئی جے) نے پاناما پیپرز جاری کرنے کے ایک سال بعد پیراڈائز پیپرز کے نام سے لیکس جاری کردی ہیں جس میں برطانیہ کی ملکہ ایلزبتھ ،امریکی وزیرخارجہ ریکس ٹلرسن، ممتازگلوکارہ میڈونا، امیتابھ بچن اور ہندوستان کے وزیرمملکت برائے سول ایوی ایشن جے ینت سنہا سمیت 714 ہندوستانی شخصیات کے نام بھی آف شور کمپنیوں میں سامنے آگئے ۔
پیراڈائز لیکس میں 25 ہزار سے زائد آف شور کمپنیوں کا انکشاف کیا گیا ہے جبکہ لیکس کا بڑا حصہ کمپنی ایپل بائی کی دستاویزات پر مشتمل ہے۔ یہ دستاویزات سنگاپور اور برمودا کی 2 کمپنیوں سے حاصل ہوئیں، پیرا ڈائز پیپرز جرمن اخبار نے حاصل کیے اور آئی سی آئی جے کے ساتھ شیئر کیے۔
دستاویزات میں 180 ممالک کی 25 ہزار سے زائد کمپنیاں، ٹرسٹ اور فنڈز کا ڈیٹا شامل ہے جبکہ ان پیپرز میں 1950 سے 2016 کا ڈیٹا موجود ہے۔ اس تحقیقاتی کاوش میں 67 ممالک کے 381 صحافیوں نے حصہ لیا، پیراڈائز پیپرز میں جن ممالک کے سب سے زیادہ شہریوں کے نام آئے ہیں ان میں امریکا 25,414 شہریوں کے ساتھ سرفہرست ہے۔
برطانیہ کے 12,707، ہانگ کانگ کے 6,120 ، چین کے 5,675 اور برمودا کے 5,124 شہری شامل ہیں۔
پیراڈائز پیپرز میں شامل سب سے بڑا بین الاقوامی نام برطانیہ کی ملکہ الزبتھ دوئم کا ہے۔
دستاویز کے مطابق ملکہ الزبتھ نے آف شور کمپنیوں میں بڑے پیمانے پرسرمایہ کاری کی، ان کے علاوہ امریکی وزیر خارجہ ریکس ٹلرسن، امریکی وزیر تجارت ولبرراس، امریکی صدر ڈونلڈ ٹرمپ کے تیرہ قریبی ساتھی، کینیڈین وزیراعظم کے قریبی ساتھی و مشیران، اردن کی سابق ملکہ نور، یورپ میں نیٹو کے سابق کمانڈر ویزلے کلارک مائیکروسافٹ، ای بے، فیس بک، نائیکی اور ایپل جیسی بڑی کمپنیوں کے حوالے سے بھی اہم انکشافات کیے گئے ہیں ۔
پیراڈائز لیکس میں ہندوستانی فلم انڈسٹری کے امیتابھ بچن،وزیر مملکت برائے سول ایوی ایشن جے ینت سنہا،بی جے پی کے رکن پارلیمنٹ آر کے سنہا اور فلم اسٹار سنجے دت کی بیوی کا نام بھی شامل ہوگیا ہے جنہوں نے آف شور کمپنی قائم کر رکھی ہے ۔
