دہشتگردی انسانیت اور اسلام دونوں کی سب سے بڑی دشمن ہے، مختار نقوی

بھارت میں اقلیتی امور کے وزیر مختار عباس نقوی نے کہا کہ دہشتگردی انسانیت اور اسلام دونوں کی سب سے بڑی دشمن ہے اور ان شیطانی طاقتوں کو شکست دینے کے لئے پوری دنیا کو متحد ہوکر کام کرنا ہوگا۔ مختار نقوی نے یہاں اقلیتی امور کے دفتر میں ان سے ملاقات کے لئے آئے ایک اعلی سطحی ایرانی وفد کے ساتھ بات چیت کے دوران ان خیالات کا اظہار کیا۔ ڈاکٹر محسن قمی کے قیادت والے اس وفد میں اسلامی کلچر اور تعلقات کی تنظیم کے ڈائریکٹر ابوذر ابراہیمی ترکمان اور ہندوستان میں ایران کے سفیر غلام رضا انصاری اور دیگر افسران موجود تھے۔ فریقین کے درمیان باہمی ثقافتی تعلقات کو مستحکم کرنے نیز دہشتگردی کے مسئلے پر بھی بات چیت ہوئی۔

مختار نقوی نے کہا کہ بھارتی وزیراعظم نریندر مودی کی قیادت والی حکومت نے دہشتگردی کے خلاف زیرو ٹالیرنس کی پالیسی اپنائی ہے۔ انہوں نے کہا کہ امن اتحاد، خیر سگالی ہندوستان کے ڈی این اے میں ہے۔ ہندوستان کی اسی طاقت کی وجہ سے شیطانی طاقتیں یہاں کبھی کامیاب نہیں ہوسکتی ہیں۔ بھارتی وزیر نے کہا کہ اسلام کو دہشتگردی کا ڈھال بنانے کی سازش میں مصروف عناصر کو ہمیں مل کر شکست دینا ہوگا۔ مختار عباس نقوی نے کہا کہ ہندوستان اور ایران کے تعلقات کافی قدیم اور مضبوط ہیں۔ گذشتہ سال بھارتی وزیراعظم نریندر مودی کے ایران دورے سے دونوں ملکوں کے درمیان تعلقات کو نئی بلندیاں ملی ہیں۔ مختار عباس نقوی نے کہا کہ دیگر شعبوں کی طرح ہندوستان اور ایران دہشتگردی کے مسئلے کے خلاف بھی عالمی سطح پر نہایت اہم رول ادا کرسکتے ہیں۔