ڈاکڑ طاہر القادری اور شیخ رشید احمد کا بھوک ہڑتال کیمپ کا دورہ

شیعیت نیوز: تحریک منہاج القرآن کے سربراہ علامہ طاہر القادری نے ایک اعلٰی سطح کے وفد اور کارکنوں کی بڑی تعداد کے ہمراہ مجلس وحدت مسلمین کے سربراہ علامہ راجہ ناصر عباس جعفری سے ایم ڈبلیو ایم کے بھوک ہڑتالی کیمپ میں ملاقات کی۔ میڈیا کے نمائندوں اور شرکاء سے خطاب کرتے ہوئے علامہ طاہر القادری نے کہا کہ پاکستان میں جاری دہشت گردی میں موجود حکمران فریق ہیں۔ موجودہ حکومت دہشت گردوں کو وسائل اور معاونت فراہم کرتی ہے۔ پاکستان میں موجود ایک مخصوص مسلک کے باصلاحیت افراد کی صرف اس لئے مسلسل ٹارگٹ کلنگ کی جا رہی ہے کہ حکمرانوں کو ان سے اختلاف ہے۔ پاکستان کے حکمران فرعونیت، قارونیت اور یزیدیت جیسی تین صفات کا مجموعہ ہیں۔ پاکستان میں عدل و انصاف کے پرخچے اڑائیں جا رہے ہیں۔ ملک کے بااختیار اداروں کو چاہیے کہ وہ عوام پر ہونے والی اس حکومتی ظلم و بربریت کا نوٹس لیں۔ اگر پاکستان کے مظلوموں کی آواز نہ سنی گئی تو وطن عزیز کی بقا و سالمیت خطرے میں پڑ جائے گی۔ انہوں نے کہا کہ گذشتہ تین عشروں سے ملک فرقہ واریت کی لپٹ میں ہے۔ خطے میں فرقہ وارانہ قتل سے شروع ہونے والی اس فضا نے دہشت گردی کی شکل اختیار کرکے پوری امت مسلمہ کو منتشر اور بدامنی کا شکار کر رکھا ہے۔

تحریک منہاج القرآن کے سربراہ نے علامہ راجہ ناصر عباس جعفری کے تمام مطالبات کی مکمل تائید کا اعلان کرتے ہوئے کہا ہے کہ ملت تشیع کے رہنما کی بھوک ہڑتال کو دو ماہ مکمل ہوگئے ہیں اور حکمران شرمناک بےحسی کا مظاہرہ کر رہے ہیں۔ ہم مجلس وحدت مسلمین کے دست و بازو ہیں۔ ہمیں جہاں پکارا جائے گا، ہم وہیں اپنی پوری تحریک کے ہمراہ ایم ڈبلیو ایم کے شانہ بشانہ کھڑے ہوں گے۔ 31 جولائی کو لاہور میں قومی مشاورت کے لئے تمام قوتوں کو بلایا جا رہا ہے، جس کی میزبانی تحریک منہاج القران اور مجلس وحدت مسلمین کرے گی۔ ظالم حکمرانوں کے خلاف آئندہ لائحہ عمل اور قومی مشاورت میں طے کیا جائے گا۔ علامہ ناصر عباس ایک صاحب کردار، باتدبیر اور باحکمت شخصیت ہیں۔ ان کے فیصلے قوم و ملت کے لئے یقیناً بہترین ہوں گے۔ علامہ ناصر عباس نے علامہ ڈاکٹر طاہر القادری، عوامی مسلم لیگ کے سربراہ شیخ رشید احمد اور دیگر شخصیات کا ہڑتالی کیمپ آمد پر شکریہ ادا کرتے ہوئے کہا کہ ہم ظالم حکمرانوں کے خلاف یہاں گذشتہ دو ماہ سے بھوک ہڑتال پر بیٹھے ہوئے ہیں۔ ہمارا احتجاج پاکستان کی بیس کروڑ مظلوم عوام کے لئے ہے۔ ہمارے حکمران بےحس ہیں۔

علامہ ناصر عباس کا کہنا تھا کہ دہشت گردی کے خلاف جاری ضرب عضب کو ناکام بنانے کے لئے نیشنل ایکشن پلان کے نام پر انتقامی کارروائیاں کی جا رہیں ہیں۔ ہمارے شیعہ نوجوان کو دہشت گردی اور حکومتی بربریت کی بھینٹ چڑھایا جا رہا ہے۔ ہم دو ماہ سے بھوک ہڑتال پر ہیں۔ پاکستان سمیت دنیا بھر میں مجلس وحدت مسلمین سے اظہار یکجہتی کے لئے احتجاج کا سلسلہ جاری ہے لیکن موجودہ حکومت بےحس بنی ہوئی ہے۔ 17 جولائی کو پاکستان کے مختلف شہروں میں ایم ڈبلیو ایم کی خواتین احتجاج کریں گی۔ 22 جولائی کو ملک کی تمام اہم شاہراوں پر اپنے مطالبات کے حق میں دھرنے دیئے جائیں گے۔ اس موقع پر شیخ رشید احمد نے کہا کہ علامہ ناصر عباس جعفری کی اس ملک کو ضرورت ہے۔ ہم ان سے اپیل کرتے ہیں کہ وہ اپنی بھوک ہڑتال کو ختم کریں۔ ہمارے حکمران بےحس، ظالم اور اخلاقیات سے عاری ہیں۔ وہ مہذب احتجاج کی زبان نہیں سمجھتے۔