اصغریہ آرگنائزیشن کا سالانہ کنونیشن بھٹ شاہ میں منعقد ہوا، برادر فضل اصغری مرکزی صدر منتخب
شیعیت نیوز: يومِ امیرالمومنین علیہ السلام کے موقع پر ثقافتی مرکز بھٹ شاہ میں اصغریہ آرگنائیزیشن پاکستان کی جانب سے 29 واں سالانہ تعمیر کردار کنوینشن کا انعقاد کیا گیا جس میں ملک بھر سے علما کرام، تنظیمی ارکان مذہبی شخصیات اور خاص طور پر تنظیم کے شعبہ خواتین سے تعلق رکھنے والی فعال خواتین نے شرکت کی۔
تنظیم کا یہ سالانہ اجتماع بڑی اہمیت کا حامل ہے اس میں مومنین و مومنات کی ایک کثیر تعداد شریک ہوتی ہے جس میں مرد، خواتین، بچے سب مل کہ مکتب اہلبیت کے پروگرام کی ترویج کی منصوبہ بندی کرتے ہیں اس اجتماع میں فکری، نظریاتی اور علمی موضوعات پر دروس ہوتے ہیں۔ کنوینشن کے پہلے روز دعا ندبہ کا نورانی پروگرام سندھ کے صوفی بزرگ شاہ عبدالطیف بھٹائی کی درگاہ پر منعقد کیا جاتا ہے، سال کے لئے تنظیم اپنا نیا میر کارواں چنتی ہے اور سال کو ایک عنوان دیا جاتا ہے، جبکہ اسی دوران تنظیمی ذمہ داران سال بھر کی کارکردگی رپورٹس پیش کرتے ہیں۔
شیعیت نیو زکے مطابق اصغریہ آرگنائزیشن کی جانب سے روان سال کو ’تعمیر کردار‘ کا عنوان دیا گیا اور سال بھر اس موضوع کے تحت پروگرام منعقد کرنے کا عزم سلیم کیا گیا اور تنظیمی پالیسی کے تحت اکثریت رائے سے اس سال کے لیئے محترم فضل حسین اصغری کو تنظیم کا مرکزی صدر چنا گیا جس کی حلف برداری کی تقریب ہوئی تنظیم کے روح رواں حجت الاسلام حضرت علامہ حیدر علی جوادی صاحب نے نئے مرکزی صدر سے حلف لیا۔ اس عظیم سالانہ اجتماع میں اس سال دو عدد نئے پروگرام متعارف کیئے گئے جس میں ایک حالات حاضرہ پر مذاکرہ کرایا گیا ، مذاکرے کے خصوصی مہمان حجت الاسلام علامہ محمد امین شہیدی صاحب اور دانشور محترم ڈاکٹر زاہد حسین زاہدی صاحب تھے اور ساتھ ہی ایک اور نیا پروگرام اس سال کی کنوینشن کی جان اعترافِ خدمت کارکنان ایوارڈ کی تقریب کی گئی جس میں تنظیم کے سینیئر ارکان کی خدمت کا اعتراف کرتے ہوئے ان کے اعزاز میں ایک ایوارڈ پیش کیا گیا۔
اس موقع پر درج ذیل بزرگ علما نے اجتماع میں موضوعاتی دروس دیئے، حجت الاسلام حضرت علامہ حیدر علی جوادی صاحب، حجت الاسلام حضرت علامہ محمد امین شہیدی صاحب، حجت الاسلام والمسلمين مولانا غلام قنبرکریمی صاحب، حجت الاسلام والمسلمین مولانا علی بخش سجادی صاحب، حجت الاسلام والمسلمین مولانا محمد حسن صلاح الدین صاحب، حجت الاسلام والمسلمین مولانا عباس وزیری صاحب۔
