را کی بلوچستان میں مداخلت : پاکستانیوں کا امریکا میں ہندوستانی سفارت خانے کے سامنے احتجاج
شیعیت نیوز: امریکا کے دارالحکومت میں کئی پاکستانی نژاد امریکیوں نے ہندوستان کے سفارتخانے کے باہر احتجاج کرتے ہوئے بلوچستان میں ہندوستانی مداخلت کے خاتمے کا مطالبہ کیا۔
واشنگٹن میںہندوستانی سفارتخانے کے باہر کئی گھنٹوں تک جاری رہنے والے احتجاج میں امریکی ریاستوں کولمبیا، ورجینیا اور میری لینڈ سے تعلق رکھنے والے پاکستانی نژاد امریکیوں نے حصہ لیا۔
احتجاج میں شامل چند افراد نے بلوچستان سے چند ہفتے قبل گرفتار ہونے والے ہندوستانی ایجنٹ کلبھوشن یادیو کی تصاویر بھی اٹھا رکھی تھیں۔
مظاہرین نے ہندوستان کی جانب سے پاکستان میں علیحدگی پسندوں کی مدد پر افسوس کا اظہار کرتے ہوئے امریکی حکومت پر زور دیا کہ وہ اپنا اثرو رسوخ استعمال کرتے ہوئے ہندوستان کو مداخلت سے روکے۔
واشنگٹن کے مصروف ترین علاقے میں ہونے والے اس پُرامن مظاہرے نے سیکڑوں افراد کو اپنی جانب متوجہ کیے رکھا۔
