پاکستان سعودی عرب سمیت کسی بھی ملک کی کالونی نہیں ہے ۔علامہ ناصر عباس
مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے سعودی وزیر دفاع شہزادہ محمد بن سلمان کے دورہ پاکستان پر تبصرہ کرتے ہوئے کہا ہے کہ سعودی حکومت پاکستان سے وہ نامناسب مطالبات منوانے کے لیے دباو ڈال رہی ہے جو قومی وقار کے منافی اور وطن عزیز کے مفادات کے لیے سخت نقصان دہ ہیں۔ سعودی ہٹ دھرمی پاکستان کو شدید خطرات سے دوچار کر سکتی ہے۔ وحدت ہاؤس کراچی سے جاری اپنے بیان میں ان کا کہناتھا کہ سفارتی تعلقات کو سفارتی انداز میں طے کیا جانا چاہیے پاکستان سعودی عرب سمیت کسی بھی ملک کی کالونی نہیں ہے بلکہ ایک آزاد ریاست ہے۔ سعودی عرب سے کوئی بھی معاملہ طے کرنے سے قبل پارلیمنٹ اور ملک کی بڑی سیاسی پارٹیوں کو اعتماد میں لیا جائے۔انہوں نے کہا کہ قوم نواز شریف کو ذاتی حیثیت میں کوئی بھی ایسا فیصلہ کرنے کی اجازت نہیں دے گی جس سے ہمارے دیگر مسلم برادر ممالک سے تعلقات متاثر ہوتے ہوں۔سعودی عرب دہشت گردی کے خاتمے کے نام پر جو اتحاد تشکیل دینے کی کوشش میں مگن ہے اس کے اغراض و مقاصد انتہائی خطرناک ہے۔ امریکی حکام اس بات کی تصدیق کر چکے ہیں کہ سعودیہ کی یہ کوشش امریکہ کی خواہشات کا عملی اظہار ہے۔عالم اسلام کوامت مسلمہ کے خلاف ہونے والے اس سازش سے آگاہ ہو جانا چاہیے۔پاکستان کسی بھی ایسے اتحاد کا حصہ بننے سے گریز کرے جوعالم اسلام کی بجائے دشمنوں کے لیے نفع بخش ہو۔وطن عزیز اس وقت نازک ترین دور سے گزر رہا ہے۔ہمیں بہت سارے داخلی و خارجی محاذوں کا سامنا ہے۔اسلام دشمن قوتوں نے نہ صرف پاکستان بلکہ بہت سارے دیگر مسلم ممالک کی سالمیت و استحکام کے خلاف دہشت گرد قوتوں کو متحرک کر رکھا ہے تاکہ مسلم ممالک داخلی طور پر کمزور ہوں۔ اب وہی استکباری طاقتیں امت مسلمہ کے اتحاد کو پارہ پارہ کرکے ہمیں آپس میں دست و گریباں دیکھنا چاہتی ہیں ۔یہودو نصاری کے اس ایجنڈے کو دانشمندانہ اور بابصیرت فیصلوں سے شکست دینا ہوگی۔
