سندھ رینجرز کا اجلاس،محرم الحرام کے سیکورٹی انتظامات کو حتمی شکل دیدی گئی
پاکستان رینجرز (سندھ) نے ایک اعلیٰ سطح اجلاس ڈی جی رینجرز سندھ میجر جنرل بلال اکبر کی زیر صدارت ہوا جس میں محرم الحرام کے موقع پر سیکیورٹی کے انتظامات کا جائزہ لیا گیا تاکہ کسی بھی ممکنہ دہشت گردی کے خطرے سے موثر طریقے سے نمٹا جاسکے۔ اجلاس میں ایڈیشنل آئی جی پی، ڈی آئی جیز ایسٹ ویسٹ ساؤتھ، اسپیشل برانچ، جوائنٹ ڈائریکٹر جنرل، آئی بی کراچی ایڈمن، سی ڈی جی کے، سی آئی اے، سی ٹی ڈی، ٹریفک، کے الیکٹرک کے نمائندے اور اس کے علاوہ اعلیٰ رینجرز حکام نے شرکت کی۔سندھ رینجرز کے ترجمان کے مطابق رینجرز اور پولیس نے مشترکہ طور پر محرم الحرام کے حوالے سے امن و امان کی صورتحال کو یقینی بنانے کے لیے سیکیورٹی کے انتظامات کو حتمی شکل دی۔ سندھ رینجرز اور پولیس کو ہائی الرٹ کردیا گیا ہے۔ رینجرز اور پولیس نے تمام بڑے شہروں میں اسنیپ چیکنگ شروع کردی ہے۔ محرم الحرام کے موقع پر رینجرز کی بھاری نفری کراچی کے مرکزی جلوسوں کی نگرانی کرے گی۔ اس کے ساتھ ساتھ ہیلی کاپٹر کے ذریعے جلوس کی فضائی نگرانی بھی کی جائے گی اور رینجرز کے سراغ رساں کتوں کی مدد سے جلوس کے راستوں کو چیک کیا جائے گا۔ اس کے علاوہ جلوس کے گزرنے والے راستوں پر واقع اونچی عمارتوں پر رینجرز اور پولیس کے اسنیپر تعینات کیے جائیں گے جو کہ شر پسند پر کڑی نظر رکھیں گے۔ جلوس کی گزرگاہوں میں آنے والے راستوں کو مکمل سیل کیا جائے گا۔ نیشنل ہائی وے اور انڈس ہائی وے پر پولیس کا گشت بڑھا دیا گیا ہے اس کے علاوہ بین الصوبائی چیک پوسٹوں پر بھی چیکنگ بڑھا دی گئی تاکہ شرپسند عناصر اپنے مذموم ارادوں میں کامیاب نہ ہوسکیں۔ اس موقع پر علما کرام سے پرزور اپیل کی گئی ہے کہ وہ مذہبی فرقہ واریت کے خاتمے اور شہر میں امن و امان قائم کرنے کیلئے قانون نافذ کرنے والے اداروں کی مدد کریں اور عوام میں اخوت و بھائی چارے کا درس اجاگر کریں اور محرم الحرام کے موقع پر امن و امان کو برقرار رکھنے کے لیے قانون نافذ کرنے والے اداروں کے ساتھ بھرپور تعاون کریں تاکہ کوئی ناخوشگوار واقعہ رونما نہ ہوسکے۔ –
