پاکستان بھر میں عید غدیر و مباہلہ کی مناسبت سے "ہفتہ ولایت و امامت” کا آغاز
ملک بھر میں عید سعید غدیر ،یوم تکمیل دین (18ذی الحجہ )کی مناسبت سے محافل میلاد اور سیمینارز کا سلسلہ شروع ہو گیا ہے۔شیعت نیوز کے نمائندے کی رپورٹ کے مطابق پاکستان کے چھوٹے بڑے شہروں میں عید سعید غدیر ،یوم تکمیل دین و اعلان ولایت و خلافت مولائے متقیان امام علی ابن ابی طالب علیہ السلام کے سلسلے میں محافل میلاد اور سیمینارز کے انعقاد کا سلسلہ شروع ہوگیا ہے، نمائندے کے مطابق شیعیان پاکستان نے 18ذی الحجہ عید سعید غدیر، یوم تکمیل دین و اعلان ولایت امیر المومنین حضرت علی ابن ابی طالب علیہ السلام تا 25 ذی الحجہ یوم مباہلہ کو ”ہفتہ ولایت و امامت ”کے عنوان سے منانے کا اعلان کیا ہے۔
ہمارے نمائندے کی اطلاع کے مطابق ملک بھر میں مختلف شیعہ ملی تنظیموں، انجمنوں اور اداروں کی جانب سے عید غدیر کی مناسبت سے ”ہفتہ ولایت و امامت”منایا جا رہا ہے جس کا آغاز جمعہ (آج رات) کی شب سے ہوگا،تاہم اس سلسلہ میں ملک بھر کی مساجد اورامام بارگاہوں میں خصوصی میلاد کی محافل کا انعقاد کیا گیا ہے اور مساجد کو خوبصورت برقی قمقوں سے سجایا بھی گیا ہے دوسری جانب آنے والے دنوں میں ہفتہ ولایت و امامت کی مناسبت سے خصوصی سیمینار بعنوان عید غدیر اور ہماری ذمہ داریاں ،فلسفہ غدیر سمیت مختلف موضوعات پر سیمینارز منعقد کئے جائیں گے۔
واضح رہے کہ مومنین نے عید غدیر کی مناسبت سے ملک بھر کی تمام شیعہ مساجد و امام بارگاہوں کو خصوصی طور پر چراغاں کر کے روشن کر دیاہے ،ساتھ ہی ساتھ یہ بات بھی قابل ذکر ہے کہ شیعیان پاکستان نے شیعہ آبادیوں کے داخلی اور خارجی راستوں پر عید غدیر کی مناسبت سے بینرز آویزاں کرنے کے ساتھ ساتھ چراغاں بھی کیا ہے جبکہ شیعہ آبادیوں میں مومنین نے اپنے گھروں کو چراغاں کر کے سجا رکھا ہے،جس کے سبب روح پرور مناظر دیکھنے کو مل رہے ہیں۔
اسی طرح عید غدیر کی مناسبت سے مرکزی اجتماعات مختلف شہروں میں 18ذی الحجہ کو ہی منعقد ہو ں گے جہاں لاکھوں عاشقان ولایت و امامت ،امیر المومنین حضرت علی ابن ابی طالب علیہ السلام کی اعلان ولایت کے عنوان پر عقیدت کے پھول نچھاور کریں گے۔
اس پرنور و رحمت و برکتوں والے دن کے موقع پر شیعت نیوز ٹیم عالم عاشقان ولایت خصوصاً صاحبِ ولایت امام زمانہ عج اور انکے نائب ولی فقیہ آیت اللہ خامنہ ای کو ہدیہ تبریک پیش کرتے ہیں۔
