یمن میں سعودی حملے میں مسجد شہید
سعودی عرب کے لڑاکا طیاروں نے یمن کے صوبہ صعدہ کی ایک مسجد پر حملہ کیا ہے-
اطلاعات کے مطابق سعودی عرب کے لڑاکا طیاروں نے یمن کے صوبے صعدہ، عدن اور العریش علاقوں پر اتوار کی رات اور پیر کی صبح حملہ کیا- سعودی لڑاکا طیاروں نے صوبہ صعدہ کی ایک مسجد پر بھی حملہ کیا ہے- یہ حملہ اتوار کے روز اذان مغرب کے موقع پر کیا گیا جس کے خلاف یمنی عوام نے وسیع احتجاج کیا- سعودی لڑاکا طیاروں کی بمباری میں مسجد شہید ہوگئی اور مسجد میں رکھے قرآن مجید کے مقدس اوراق آس پاس بکھر گئے- یمنی فوج اور عوامی رضاکاروں نے سعودی عرب کی وحشیانہ جارحیت کے جواب میں نجران کے علاقے میں سعودی فوجی اڈوں پر میزائل حملہ کیا- اس حملے میں متعدد سعودی فوجی ہلاک ہوگئے۔ادھر اقوام متحدہ کی تنظیم یونیسکو نے دارالحکومت صنعا کے تاریخی مقامات پر سعودی لڑاکا طیاروں کے حملوں کی مذمت کی ہے- یونیسکو کی ڈائریکٹر جنرل ایرینا بوکووا نے کہا کہ سعودی عرب کے وحشیانہ حملوں میں یمن کے اہم تاریخی مقامات تباہ ہوگئے ہیں- انہوں نے کہا کہ یمن میں سعودی جارحیت سے عراق اور شام میں داعش اور جبہۃ النصرہ گروہوں کے ہاتھوں آثار قدیمہ کی تباہی کی یاد تازہ ہورہی ہے