سیاسی چیلنجز کے باعث قومی ایکشن پلان پر عملدرآمد میں وقت لگے گا، عاصم باجوہ

ڈی جی آئی ایس پی آر میجر جنرل عاصم سلیم باجوہ کا کہنا ہے کہ سیاسی چیلنجوں کی وجہ سے قومی ایکشن پلان پر عملدرآمد میں وقت لگے گا۔ قبائلی علاقے میں عملی کارروائیاں اور دہشتگردوں کی مالی معاونت بند ہونا نیشنل ایکشن پلان کی کامیابی کا مظہر ہیں۔ روسی خبر رساں ادارے کو انٹرویو دیتے ہوئے ڈی جی آئی ایس پی آر میجر جنرل عاصم سلیم باجوہ کا کہنا تھا کہ نیشنل ایکشن پلان دہشتگرد گروہوں کی مالی مدد روکنے میں موثر ثابت ہو رہا ہے۔ اس منصوبے کی بڑی کامیابی قبائلی علاقے میں عملی کارروائیاں ہیں۔ انہوں نے بتایا کہ اگرچہ دہشتگردی کے خلاف نیشنل ایکشن پلان کے کچھ حصوں کو شروع کیا جا چکا ہے لیکن سیاسی چیلنجز کے باعث ایکشن پلان کے بعض حصوں پر عملدرآمد کیلئے وقت درکار ہے۔ انہوں نے مزید کہا کہ شدت پسندی سے نجات کے لئے کچھ پائلٹ پروگرام شروع کئے تھے جن کا دائرہ اب قومی سطح تک وسیع کر دیا گیا ہے۔ ڈی جی آئی ایس پی آر نے پاکستان کے وفد کے دورہ ماسکو کو مثبت قرار دیتے ہوئے کہا کہ پاکستان روس سے عسکری ساز و سامان خریدنے کے ایک معاہدے کو حتمی شکل دینا چاہتا ہے۔