مولانا سمیع الحق پاکستانی عوام کے نہیں اسلام دشمن طالبان کے ترجمان ہیں، اطہر عمران
امامیہ اسٹوڈنٹس آرگنائزیشن پاکستان کے مرکزی صدر اطہر عمران طاہر نے مولانا سمیع الحق کے حالیہ میڈیا پر جاری کردہ بیان کی شدید الفاظ میں مذمت کرتے ہوئے کہا کہ مولانا کے اس بیان کہ جو آپریشن کی بات کر رہے ہیں ان کے بریگیڈ بنا کر طالبان سے مقابلہ کے لئے بھیجا جائے پاکستانی عوام بالخصوص شہداء کے خانوادوں کے خلاف سازش اور ان کا مذاق اُڑانے کے مترادف ہے۔ انہوں نے کہا کہ کل تک جو پاکستان کے وجود اور دستور کو نہیں مان رہے تھے، جن کے ہاتھ 60 ہزار سے زائد معصوم لوگوں کے خون سے رنگین ہیں، وہ کیسے ہمارے بھائی اور وطن دوست ہوسکتے ہیں۔ انہوں نے کہا کہ جو عناصر اسلام اور پاکستان کے دشمن ہیں، ان کی وکالت کرنا سمجھ سے بالاتر ہے۔ مولانا کو ایسے بیان دینے سے پہلے سوچنا چاہیے تھا کہ ان کے اس نامناسب بیان سے ناصرف پاکستانی عوام بلکہ شہداء کے لواحقین کے دلوں پر کیا گزرے گی۔ انہوں نے مزید کہا کہ اسلام کے نام پر نہتے عوام کے خون سے ہولی کھیلی جا رہی ہے اور مولانا سمیع الحق پاکستانی عوام کے نہیں بلکہ اسلام دشمن طالبان کے ترجمان ہیں۔ اس بیان پر مولانا کو پوری قوم سے معافی مانگنی چاہیے۔