لبنان کی حفاظت کے لئے حزب اللہ آمادہ
لبنانی پارلمینٹ میں مزاحمتی دھڑے کے نمائندوں نے کہا ہے کہ دہشت گردانہ سازشوں سے لبنان کی حفاظت کے لئے حزب اللہ آمادہ ہے ۔ العہد لبنانی ویب سائٹ کی رپورٹ کے مطابق لبنانی پارلیمنٹ ميں مزاحمتی دھڑے کے رکن حسین الموسوی نے آج ایک بیان میں کہا ہے کہ دولۃ الاسلامیہ فی العراق و الشام داعش دہشت گرد گروہ سے وابستہ عناصر فرقہ واریت کی اسٹریٹجی کے ساتھ عراق ، شام اور لبنان کو اپنا نشانہ بنائے ہوئے ہیں ۔ اس بیان میں مزید کہا گيا ہے کہ دہشت گرد گروہ داعش سے مقابلے کے مقصد سے عراقیوں کے لئے بہترین راستہ قومی حکمت عملی اپنانا ہے ۔ دوسری جانب موصولہ خبروں کے مطابق لبنانی فوج نے تکفیری دہشت گردوں کے خلاف فوجی کاروائیوں کا آغاز کردیا ہے ۔ اور لبنانی فوج ، شام کی سرحد کے قریب عرسال شہرکی چوٹیوں پر تکفیری دہشت گردوں کا پتہ لگارہی ہے ۔ در ایں اثنا خبری ذرائع نے کہا ہے کہ دہشت گرد گروہ جبھۃ النصرہ نے لبنان کی سرحد کے قریب واقع شام کے شہر رنکوس پر حملہ کردیا تاہم شام کی فوج کے بروقت ردعمل سے دہشت گردوں کو شکست ہوئی اور متعدد ہلاک اور زخمی ہوگئے ۔
