ترکی کے مسافر طیاروں پر شام کی فضائی حدود استعمال کرنے پر پابندی
ترک حکومت کےتحریک آمیز اور شرانگیز اقدامات اور شام کے مسافر طیارے کو انقرہ میں جبری طور پر اترانے کے واقعات کے بعد شام نے ترکی کے مسافر طیاروں پر شام کی فضائی حدود استعمال کرنے پر پابندی عائد کردی ہے۔ رپورٹ کے مطابق شام نے گذشتہ رات 12 بجے کے بعد ترکی کی تمام پروازوں کے لئے شامی فضائی حدود میں پرواز کو ممنوع قراردیدیا ہے۔ شام کا کہنا ہے کہ ترکی شام کے اندرونی معاملے میں بے جا مداخلت کررہا ہے اور مسلح دہشت گردوں کی حمایت کررہا ہے۔ ادھر ترکی کے وزیر اعظم رجب طیب اردوغان نے شا م کے بارے میں سکیورٹی کونسل کی سستی پر سخت برہمی کا اظہار کرتے ہوئے کہا ہے کہ سکیورٹی کونسل کو شام کے بارے میں ٹھوس اقدام اٹھانا چاہیے۔ شام کی سرکاری خبر رساں ایجنسی کے مطابق حکومت نے ترکی کے مسافر بردار طیاروں پر شامی فضائی حدود میں داخلے پر پابندی لگا دی ہے۔یہ فیصلہ بدھ کے روز ترکی کی جانب سے شامی ایئر لاین کے مسافر طیارے کو ماسکو سے دمشق جاتے ہوئے انقرہ میں اترنے پر مجبور کرنے کے بعد کیا گیا ہے۔