بحرین، آل خلیفہ کے خلاف جاری مظاہرے
بحرین میں سیکیورٹی فورسیز کی جانب سے مظاہرین کے خلاف جارحانہ کاروائیوں اور بربریت کے باوجود اس ملک کے عوام کا آل خلیفہ کے خلاف احتجاج اور مظاہروں کا سلسلہ بدستور جاری ہے جبکہ دارالحکومت منامہ کے اطراف میں کئے جانے والے مظاہرے کے کئی شرکاء کو سیکیورٹی فورسیز نے گرفتار کرکے انھیں نامعلوم جگہ منتقل کردیا۔
بحرین کے مظاہرین نے اپنے ملک کی آل خلیفہ ڈکٹیٹر حکومت کی مذمت کرتے ہوئے اعلان کیا ہے کہ آل خلیفہ حکومت اپنی سیکیورٹی فورسیز کی جارحانہ کاروائیوں اور گرفتاریوں کے عمل سے اپنے خلاف اٹھنے والی تحریک ہرگز دبا نہیں سکے گی اور بحرین میں اصلاحات کے نفاذ اور اسی طرح منتخب عوامی جمہوری حکومت کے قیام تک مظاہروں کا سلسلہ بدستور جاری رہے گا۔العالم کے مطابق بحرینی عوام کی انقلابی تحریک اپنے اسی آب و تاب کے ساتھ جاری ہے اور بحرینی عوام، آل خلیفہ حکومت کے خلاف اپنے پرامن مظاہروں کا سلسلہ جاری رکھے ہوئے ہیں۔قابل ذکر ہے کہ بحرین میں شیعہ مسلمان اکثریت میں ہیں۔