اردن میں تکفیری دہشتگردوں نے حضرت جعفر طیار (ع) کے مزار کو نذرآتش کر دیا
ایرانی خبر رساں ادارے فارس نیوز نے "عربی پریس” کے حوالے سے خبر دی ہے کہ ابھی شام میں پیغمبر اکرم (ص) کے بزرگوار صحابی اور حضرت علی (ع) کے وفادار ساتھی
"حضرت حجر بن عدی” کے مزار کے انہدام کو دو دن بھی نہیں گزرے کہ سینکڑوں شدت پسند تکفیری دہشتگردوں نے اردن کے جنوب میں واقع صوبہ "کرک” میں حضرت جعفر بن ابی طالب (ع) جو کہ حضرت جعفر طیار (ع) سے نام سے معروف ہیں، کے مزار کو آگ لگا دی ہے۔ جمعرات کے دن "حضرت حجر بن عدی کندی” جو کہ معاویہ بن ابی سفیان کے توسط سے شہید ہوئے تھے، کے مزار کو دمشق کے نزدیک شامی سلفی دہشتگردوں نے منہدم کر دیا تھا اور نبش قبر کے بعد ان کے جسد مطہر کو جو کہ سالم حالت میں تھا، کسی نامعلوم مقام کی طرف منتقل کر دیا تھا۔
حضرت جعفر بن ابی طالب جو کہ جعفر طیار کے نام سے معروف تھے، ان کی آرامگاہ اردن کے جنوب میں واقع صوبہ "کرک” کے علاقہ "المزار” میں واقع ہے۔ حضرت جعفر بن ابی طالب کا مزار اہل تشیع کے ایک فرقہ اسماعیلی جو کہ اس علاقہ میں آباد ہیں، کے لئے بہت اہمیت کا حامل ہے۔ ایسی صورت حال میں جبکہ تکفیری دہشتگردوں کی طرف سے مقدسات اسلامی اور اولیاءاللہ کے مزارات کی اہانت کا سلسلہ جاری ہے، اور اس قبیح اقدام کے نتیجے میں جہان اسلام کے اندر شدید غم و غصہ پایا جاتا ہے، اردن کے حمکرانوں نے حضرت جعفر طیار (ع) کے مزار کی اہانت پر سکوت اختیار کر رکھا ہے اور اس ملک کا میڈیا بھی اس خبر کے نشر اور پبلش کرنے سے پرہیز کر رہا ہے۔
