بحرین میں عوامی مظاہرے اور ولیعہد کی اپنے عوام کو دھمکی

بحرین کے ولیعہد نے ایک بار پھر اس ملک کے انقلابی عوام کو دھمکی دی ہے کہ وہ انہيں کچل دیں گے سلمان بن حمد آل خلیفہ نے بحرین کے پرامن مظاہرین پر الزام لگایا کہ وہ اس ملک کو تقسیم کرنا چاہتے ہيں انہوں نے کہا کہ جو لوگ بحرین کے ٹکڑے کرنا چاہتے ہيں ان کو کچل دیا جائے گا یاد رہے کہ بحرین کے ولیعہد نے ایک ایسے وقت اپنے ہی ملک کے پرامن شہریوں پر  ملک کو تقسیم کرنے کا الزام لگایا ہے جب ان کا سب سے اہم مطالبہ ملک میں آزادانہ انتخابات کا انعقاد اور بنیادی آئین میں اصلاحات ہے ۔ بحرین کے ولیعہد نے یہ دھمکی ایک ایسے وقت دی ہے جب بحرین کے عوام نے کل رات اور آج ایک بار پھر بڑے پیمانے پر مظاہروں میں شرکت کرکے آل خلیفہ کی حکومت کی سرنگونی تک اپنے مظاہرے جاری رکھنے کا اعلان کیا ہے ۔ کل رات اور آج ہزاروں کی تعداد میں بحرینی شہریوں نے حکومت مخالف مظاہروں میں شرکت کرکے اپنے مطالبات پورے ہونے تک احتجاج جاری رکھنے کا اعلان کیا ۔ بحرین کی سب سے بڑی اپوزیشن جماعت جمعیت اسلامی وفاق ملی نے کہا کہ تحریک کے آغاز سے لے کر اب تک بحرین کی سیکورٹی فورسز نے منامہ کی چیک پوسٹوں سے دسیوں افراد کو اغوا کیاہے جن کا ابھی تک کوئی سراغ نہيں لگ سکا ہے بحرین کی حکومت نے سرکاری اداروں سے سیکڑوں افراد کو نکال دیا ہے جبکہ مختلف کھیلوں کی قومی ٹیموں کے ان بہت سے کھلاڑیوں کو بھی باہر کردیا ہے جنھوں نے اپنے عوام کی تحریک کی حمایت کا اعلان کررکھا ہے