جوہری مسئلے میں مغرب حقیقت پسندی کا مظاہرہ کرے،ڈاکٹر لاریجانی

اسلامی جمہوریہ ایران کے پارلیمانی اسپیکر ڈاکٹر علی لاریجانی نے کہا ہے کہ مغرب کو چاہیئے کہ ایران کے جوہری مسئلے میں حقیقت پسندی کا مظاہرہ کرے۔ ایران کی مجلس شورائے اسلامی کے اسپیکر نے کل رات مینسک میں ایران کے سفارتکاروں سے گفتگو میں اس بات کا ذکر کرتے ہوئے کہ ایران جوہری مسئلے میں صحیح سمت قدم اٹھا رہا ہے، کہا کہ مقابل فریق اس نتیجے پر پہنچ گیا ہے کہ جوہری توانائی سے ایران کو دستبردار کرانے کی کوششوں کا دور اب گذر چکا ہے اسلئے مغرب کو چاہیئے کہ جوہری مسئلے میں حقیقت پسندی کا مظاہرہ کرے۔ ڈاکٹر علی لاریجانی نے بیلاروس کے مختلف حکام منجملہ صدر مملکت، وزیراعظم اور سینٹ کے چیئرمین کے ساتھ اپنی ملاقاتوں کا ذکر کرتے ہوئے کہا کہ مجموعی طور پر مذاکرات مثبت رجحان کے ساتھ انجام پائے۔قابل ذکر ہے ایران کے پارلیمانی اسپیکر ڈاکٹر علی لاریجانی، بیلاروس کے ساتھ دو طرفہ تعلقات کے فروغ کے تناظر میں اس ملک کے حکام کی دعوت پر کل مینسک پہنچے تھے۔