انتخابات میں شرکت دشمن شکن

رہبرانقلاب اسلامی نے آئندہ پارلمانی انتخابات میں عوام کی بھرپور اور دشمن کو مایوس کرنے والی شرکت پر تاکید فرماتے ہوئے، تمام حکام اور انتخابی امیدواروں سے کہا ہے کہ قانون کی مکمل پابندی سے ایسے انتخابات کی زمین ہموار کریں جس میں مکمل رقابت ہو اور صحت مند انتخابات ہوں۔ 

رہبرانقلاب اسلامی حضرت آیت اللہ العظمي خامنہ ای نے فرمایا کہ ایسے عالم میں جبکہ ملت ایران نے سربلندی سے بہت سی کامیابیاں حاصل کر لی ہیں اور نئی کامیابیوں کے آثار کا بھی مشاہدہ کر رہی ہے سامراجی محاذ پابندیوں سے حکام اور عوام کو ڈرا دھمکا کر ان کے عزم میں خلل ڈالنے اور عوام کو میدان سے نکالنے کی کوشش کر رہا ہے جبکہ ملت ایران نے اس پرافتخار راہ کا انتخاب بصیرت سے کیا ہے اور اس راہ پر گامزن رہنے کے لئے بڑی جدوجہد کی ہے اور اپنے عزیزترین افراد کی قربانی کا نذرانہ پیش کیا ہے۔

رہبرانقلاب اسلامی نے فرمایا کہ چوٹیوں تک پہچنے کا ملت ایران کا یہ سفر کبھی نہیں رکے گا۔ آپ نے فرمایا کہ دشمن ایسے عالم میں عوام اور حکام کے عزم میں خلل ڈالنے کی کوشش کر رہا ہے کہ جب آج اسلامی جمہوریہ ایران کی طاقت اور اقتدار کا گذشتہ بیس یا تیس سال سے موازنہ نہیں کیا جاسکتا اور سامراجی محاذ کا ظاہری دبدبہ بھی گذشتہ برسوں میں روزافزون کمزوری اور ناتوانی میں تبدیل ہوچکا ہے۔ رہبرانقلاب اسلامی نے انتخابات کو عوام کی موجودگي کا مظہر قرار دیا۔ آپ نے فرمایا کہ مدتوں پہلے سے کفر و سامراج کی کمان اور اس کے ایجنٹوں اور آلہ کاروں نے داخلی اور بیرونی سطح پر بڑے وسیع پیمانے پر کوششیں شروع کر رکھی ہیں کہ پارلیمنٹ کے انتخابات میں عوام کی شرکت کو گھٹاسکیں لیکن خدا کے فضل و کرم سے ان انتخابات میں بھی عوام کی شرکت سے دشمن مایوس ہوجائیں گے۔