جہاد فی سبیل اللہ کو جاری رکھیں اور انسانی عزت وکرامت کی قدر کریں

رہبرانقلاب اسلامی حضرت آيت اللہ العظمی خامنہ ای نے فرمایا ہے کہ مسلمان قومیں امریکہ اور صیہونیوں کو اس بات کا موقع نہیں دیں گي کہ اختلاف و تفرقہ پیدا کر کے علاقے کی قوموں کی اسلامی بیداری کی عظیم تحریک کو منحرف کریں یا ان سے غلط فائدہ اٹھاسکیں۔

حضرت آیت ا للہ العظمی خامنہ ای نے آج حکام اور عوام سے خطاب میں ملت ایران اور امت اسلامی کوعید بعثت کی مبارک باد پیش کرتے ہوئے فرمایا کہ اگر اسلامی قومیں فوجی، سیاسی، اقتصادی اور ثقافتی میدانوں میں جہاد فی سبیل اللہ کو جاری رکھیں اور انسانی عزت وکرامت کی قدر کریں تو یقینا وہ اپنا شایان شان مقام حاصل کرلیں گي۔ رہبرانقلاب اسلامی نے فرمایا کہ مشرق وسطی اور شمالی افریقہ کے بعض ملکوں کےحالات سے معلوم ہوتا ہے کہ مسلمان قومیں اسلام کی سعادت بخش نعمت کی طرف متوجہ ہیں۔ آپ نے فرمایا کہ مصر اور تیونس نیز دیگر ملکوں میں اسلامی بیداری کی عظیم تحریک سے پتہ چلتا ہے کہ مغربی تسلط پسندوں اور ان کے پٹھو حکمرانوں نےگذشتہ ایک سو پچاس برسوں میں جو ظالمانہ اور تحقیرآمیز حالات قوموں پر مسلط کر رکھے تھے وہ اب ختم ہو رہے ہیں اورعلاقے کی تاریخ کا ایک نیا باب شروع ہوچکا ہے۔

رہبرانقلاب اسلامی نے فرمایا کہ خدا کے فضل و کرم سے علاقے کا مستقبل تابناک ہے ۔ آپ نے ان تحریکوں کی اسلامی ماہیت کے انکار اور اسے مخفی رکھنے میں سامراجی طاقتوں کی ہٹ دھرمی اور ڈھیٹ پن کی طرف اشارہ کرتے ہوئے کہا کہ امریکہ اور صیہیونیوں اور ان کے پٹھوؤں اور ہمنواؤں نے قوموں کی ان عظیم تحریکوں کو منحرف کرنے کے لئے اپنے سارے و‎سائل و ذرائع استعمال کرنا شروع کر دئے ہیں اور وہ اپنے پٹھوؤں کو اقتدار میں لاکر ماضی کی طرح ظالمانہ حکومت دوبارہ برقرار کرنا چاہتے ہیں۔ آپ نے فرمایا جب کوئي قوم بیدار ہوجاتی ہے اور جان ہتھیلی پر رکھ کر میدان میں آ جاتی ہے تو کوئي بھی اسے شکست نہیں دے سکتا۔

آپ نے امریکہ اور صیہونی حکومت کی پیچیدہ سازشوں اور کوششوں کے مقابل قوموں اور ملتوں کی سربرآوردہ شخصیتوں کی بیداری اور ہوشیاری کی ضرورت پر تاکید کرتے ہوئے فرمایا کہ تسلط پسند طاقتوں کے پیدا کئے ہوئے مسائل بیدار قومیں کے سامنے ہمیشہ رہیں گے لیکن عوام اور امت کی سربرآوردہ شخصیتوں کی بیداری اور ہوشیاری سے وہ تحریک جو علاقے میں شروع ہوچکی ہے انشاءاللہ بھرپور طرح سے جاری رہے گي۔