پڑوسی ممالک اپنی سرزمین ایران کے خلاف استعمال نہ ہونے دیں؛ ایرانی وزیر خارجہ کی قطری ہم منصب سے گفتگو

شیعیت نیوز : ایرانی وزیرِ خارجہ ڈاکٹر سید عباس عراقچی نے تہران میں اپنے قطری ہم منصب شیخ محمد بن عبد الرحمٰن آل ثانی سے اہم ملاقات کی۔ اس موقع پر انہوں نے واضح کیا کہ خطے کی موجودہ کشیدہ صورتحال مکمل طور پر امریکہ اور غاصب صیہونی حکومت کی فوجی جارحیت اور مسلسل غیر قانونی مداخلت کا نتیجہ ہے۔

انہوں نے خطے کے تمام ممالک پر زور دیا کہ وہ حسنِ ہمسائیگی کے اصولوں کی سختی سے پاسداری کریں۔ ایرانی وزیر خارجہ نے متنبہ کیا کہ کوئی بھی خطائی ملک امریکہ کو اپنی سرزمین اور سہولیات ایران کے خلاف جارحانہ اقدامات، سازشوں یا اقتصادی جنگ کے لیے استعمال کرنے کی ہرگز اجازت نہ دے۔

یہ بھی پڑھیں : غاصب اسرائیل بیروت کی طرف پیش قدمی نہیں کر سکتا، محسن رضائی

ڈاکٹر عباس عراقچی نے دو ٹوک الفاظ میں کہا کہ ایران کو پہنچنے والے نقصانات اور اس کے خلاف کیے گئے سنگین جرائم کو کسی صورت نظر انداز نہیں کیا جا سکتا۔ انہوں نے واضح کیا کہ ان جارحانہ کارروائیوں کا ازالہ کیے بغیر خطے میں 28 فروری 2026 سے پہلے کی صورتحال کی بحالی کی کوئی بات نہیں کی جا سکتی۔

ایرانی وزیرِ خارجہ نے اس بات کا پختہ اعادہ کیا کہ اسلامی جمہوریہ ایران اپنے قومی مفادات اور سلامتی کے تحفظ کے لیے مکمل طور پر پُرعزم اور ثابت قدم ہے۔ انہوں نے کہا کہ ایران اپنی قومی خودمختاری کے دفاع کے لیے ہر ممکنہ دستیاب صلاحیت اور وسائل کو بھرپور طریقے سے بروئے کار لائے گا۔