تہران میں 40ویں بین الاقوامی کانفرنسِ وحدتِ اسلامی کا آغاز، 40 ممالک کے نمائندوں کی شرکت

شیعیت نیوز : اسلامی جمہوریہ ایران کے دارالحکومت تہران میں چالیسویں بین الاقوامی کانفرنسِ وحدتِ اسلامی کا شاندار اور باقاعدہ آغاز ہو گیا ہے۔ "شہید امام کے افکار میں وحدتِ اسلامی” کے عنوان سے منعقدہ اس عظیم الشان کانفرنس میں پاکستان، عراق، ترکی اور لبنان سمیت 40 ممالک کے تقریباً 600 ملکی و غیر ملکی مہمان شریک ہیں۔

اس اہم کانفرنس کا بنیادی مقصد امتِ مسلمہ کی شناخت، حکمرانی، مقاومتی معیشت اور عالمِ اسلام کو درپیش عصری چیلنجز پر تفصیلی تبادلہ خیال کرنا ہے۔ کانفرنس کے دوران جدید اسلامی تہذیب، مشترکاتِ اسلامی، اقتصادی تعاون، امن و سلامتی اور بالخصوص فلسطین و لبنان کے سلگتے ہوئے مسائل پر خصوصی گفتگو کی جائے گی۔

یہ بھی پڑھیں : سکردو: بزم علم و فن کے زیرِ اہتمام شاندار سیرت کانفرنس، ہفتہ وحدت کا عملی مظاہرہ

شیڈول کے مطابق یہ غیر متمرکز کانفرنس 30 اگست تک تہران کے علاوہ قم اور مشہد مقدس میں بھی جاری رہے گی، جبکہ چار مختلف صوبوں میں خصوصی نشستیں اور ویبینار سیشنز کا بھی انعقاد کیا جائے گا۔ اس دوران علمائے کرام اور دانشور اسلامی اتحاد کو درپیش چیلنجز اور ان کے حل کے لیے تجاویز پیش کریں گے۔

کانفرنس کے دیگر نمایاں اور اہم پروگراموں میں بیداریِ اسلامی کے موضوع پر خصوصی نشستیں، نمازِ جمعہ کی ادائیگی اور وزیر خارجہ کی جانب سے دی گئی دعوت شامل ہے۔ اس کے علاوہ قم میں علمی اجلاس اور مشہد مقدس میں شہید رہبر سے تجدیدِ عہد کی پروقار تقریبات بھی اس عظیم کانفرنس کا حصہ ہوں گی۔