سینیٹر علامہ راجہ ناصر عباس جعفری کا افسوسناک بیان: اسلام آباد ترلائی امام بارگاہ خدیجۃ الکبریٰ دھماکے کی شدید مذمت، خون کی اپیل

شیعیت نیوز : سینیٹر علامہ راجہ ناصر عباس جعفری، چیئرمین مجلس وحدت المسلمین نے اسلام آباد کے علاقے ترلائی میں امام بارگاہ خدیجۃ الکبریٰ میں ہونے والے خودکش دھماکے پر گہرے دکھ اور غم کا اظہار کرتے ہوئے ایک اہم بیان جاری کیا ہے۔

انہوں نے کہا: «اسلام آباد کے علاقے ترلائی میں مسجد خدیجہ الکبریٰ میں ہونے والے افسوسناک دھماکے اور بے گناہ نمازیوں کی شہادت پر میں دلی طور پر نہایت غمزدہ اور رنجیدہ ہوں۔ وفاقی دارالحکومت میں اس نوعیت کی دہشت گردانہ کارروائی نہ صرف انسانی جانوں کے تحفظ میں سنگین ناکامی کا ثبوت ہے بلکہ یہ انتظامیہ اور قانون نافذ کرنے والے اداروں کی کارکردگی پر بھی ایک بڑا سوالیہ نشان ہے۔

یہ بھی پڑھیں: اسلام آباد ترلائی امام بارگاہ میں خودکش دھماکہ: 26 شہید، 30 سے زائد زخمی

میں اس وحشیانہ اور بزدلانہ حملے کی شدید ترین الفاظ میں مذمت کرتا ہوں اور شہداء کے اہلِ خانہ سے دلی تعزیت و ہمدردی کا اظہار کرتا ہوں، جبکہ زخمیوں کی جلد صحت یابی کے لیے دعا گو ہوں۔ عبادت گاہوں کو نشانہ بنانا انسانیت، دین اور معاشرتی اقدار پر براہِ راست حملہ ہے جسے کسی صورت برداشت نہیں کیا جا سکتا۔

میں اسلام آباد کے باشعور اور باہمت نوجوانوں سے پرزور اپیل کرتا ہوں کہ اس نازک گھڑی میں انسانیت کا ثبوت دیتے ہوئے آگے بڑھیں۔ اس وقت اسلام آباد کے مختلف ہسپتالوں میں زخمی نمازیوں کے لیے خون کی شدید ضرورت ہے، لہٰذا آپ سب اس کارِ خیر میں بڑھ چڑھ کر حصہ لیں اور قیمتی جانیں بچانے میں اپنا کردار ادا کریں۔»

یہ بیان ترلائی سانحے میں 26 سے زائد شہیدوں اور 30 سے زائد زخمیوں کی خبر کے بعد سامنے آیا ہے۔