ٹرمپ کو نوبیل دینے کی حمایت ظالموں کا ساتھ ہے، مولانا کلب جواد

شیعیت نیوز : لکھنؤ/ امریکی صدر ڈونالڈ ٹرمپ کو امن نوبیل پرائز دیئے جانے کی حمایت کی سخت مذمت کرتے ہوئے مجلس علمائے ہند کے جنرل سیکریٹری مولانا سید کلب جواد نقوی نے کہا کہ کیا اب ظالموں اور قاتلوں کو امن کا نوبیل پرائز دیا جائے گا؟ جو لوگ جنگ اور دہشت گردی کی بنیاد ڈالتے ہیں، انہیں ہی امن کا نوبیل پرائز دینے کے لیے منتخب کرنے کی سفارش کی جا رہی ہے، یہ افسوس ناک ہے۔

انہوں نے کہا کہ اگر امن کا نوبیل پرائز دینا ہے تو ان لوگوں کو دیا جائے جنہوں نے قیامِ امن کے لیے عملی اقدامات کیے ہیں۔ اُن میں سرفہرست رہبر انقلاب اسلامی ایران آیت اللہ خامنہ ای اور شہید سید حسن نصراللہ جیسی عظیم شخصیات کو ہونا چاہیے۔

یہ بھی پڑھیں : سیستان و بلوچستان میں سیکیورٹی آپریشن، تین دہشتگرد ہلاک چار گرفتار

مولانا نے آگے کہا کہ پاکستان نے بھی ٹرمپ کو نوبیل دیے جانے کی حمایت کی ہے جو قابلِ مذمت ہے۔ بھارت نے ابھی ٹرمپ کو امن نوبیل پرائز دینے کے بارے میں کوئی واضح مؤقف اختیار نہیں کیا، مگر بھارت کو اس کی مخالفت کرنی چاہیے۔ انہوں نے کہا کہ ٹرمپ کو امن نوبیل دینے کی حمایت کا فیصلہ ملک کے مفاد میں ہرگز بہتر نہیں ہوگا، اس لیے اس کی پرزور مخالفت ہونی چاہیے۔

مولانا نے کہا کہ ٹرمپ مسلسل ہندوستان کی اقتصادیات کو تباہ کرنے کے لیے ٹیرف لگا رہا ہے، ایسے شخص کو نوبیل پرائز دینے کی حمایت کرنا ہندوستانی عوام کے ساتھ دھوکا ہوگا۔

مولانا نے کہا کہ ہم برسہا برس سے کہہ رہے ہیں کہ امریکہ و اسرائیل کی دوستی سے دشمنی بھلی ہے۔ دوستی کا نتیجہ یہ ہوا کہ ٹرمپ مسلسل ہندوستان پر اضافی ٹیرف لگا رہا ہے تاکہ ہندوستان کی معیشت کو پاکستان سے بدتر بنا دیا جائے۔ لہٰذا ایسے شخص کو جو ہزاروں بے گناہوں کا قاتل اور ہمارے ملکی مفادات کا دشمن ہے، اس کو نوبیل پرائز دینے کی حمایت کرنا غیر منصفانہ عمل ہوگا، اس لیے ہندوستانی حکومت کو ٹرمپ کو نوبیل پرائز دینے کی سخت مخالفت کرنی چاہیے۔