حکومت ریمدان اور تفتان بارڈر پر مکمل سہولیات فراہم کرے، علامہ مقصود علی ڈومکی
علامہ مقصود ڈومکی نے کہا ہے کہ زیارت امام حسینؑ اور آئمہ اہل بیتؑ کی قبور مطہرہ کی زیارت عظیم عبادت ہے، اور حکومت کو چاہئے کہ زائرین کی مشکلات میں کمی کرے
شیعیت نیوز : مجلس وحدت مسلمین پاکستان کے مرکزی رہنماء علامہ مقصود علی ڈومکی نے حکومت پاکستان سے پرزور مطالبہ کیا ہے کہ زائرین کربلا، ایران و عراق کو درپیش مشکلات کو فوری طور پر حل کیا جائے۔
زیارت امام حسینؑ اور آئمہ اہل بیتؑ کی قبور مطہرہ کی زیارت عظیم عبادت ہے، اور حکومت کو چاہئے کہ زائرین کی مشکلات میں کمی کرے، نہ کہ زائرین اور قافلہ سالاروں پر ٹیکس عائد کرکے اس مقدس سفر کو مہنگا بنائے۔
تفتان بارڈر اور رمدان بارڈر پر زائرین کے لیے خصوصی سہولیات فراہم کی جائیں۔
رمدان بارڈر پر آرام گاہ، ویٹنگ روم اور صاف ستھرے واش رومز کی تعمیر کو فوری ممکن بنایا جائے تاکہ زائرین کو سکون اور سہولت میسر ہو۔
انہوں نے بلوچستان میں امن و امان کی ابتر صورتحال پر شدید تشویش کا اظہار کرتے ہوئے کہا کہ حالیہ دنوں ژوب اور قلات کے مقام پر بے گناہ مسافروں کو گولیوں کا نشانہ بنایا گیا، جو کہ انتہائی افسوسناک اور قابل مذمت ہے۔
یہ بھی پڑھیں : جامعہ کراچی میں آئی ایس او کی جانب سے سالانہ عظیم الشان یوم حسینؑ کا انعقاد
زائرین کے روٹ کو مکمل طور پر محفوظ بنایا جائے اور بلوچستان کے مسئلے کو طاقت اور تشدد کی بجائے گفتگو، مذاکرات اور مفاہمت کے ذریعے حل کیا جائے۔
طاقت کا استعمال صرف دہشت گردوں اور مجرموں کے خلاف ہونا چاہیے، نہ کہ عام شہریوں کے خلاف۔
آخر میں انہوں نے کہا کہ بلوچستان کے مسنگ پرسنز کا مسئلہ ایک بار پھر شدت اختیار کر چکا ہے، اور متاثرہ خاندان اسلام آباد پہنچ چکے ہیں۔
ریاستی اداروں کو چاہئے کہ وہ ان کی بات سنیں متاثرین کے زخموں پر نمک پاشی کی بجائے مرہم رکھیں اور مسنگ پرسنز کا مسئلہ آئین و قانون کے مطابق فوری حل کریں۔
