ملی یکجہتی کونسل پاکستان کے وفد کی سفیر ایران رضا امیری مقدم سے ملاقات
عالم اسلام کی جانب سے ایران نے ہمیشہ فلسطینی مسلمانوں کی نہ صرف کھل کر حمایت کی بلکہ مقاومت کی تحاریک کو اخلاقی، سفارتی سطح پر سپورٹ بھی دی
شیعیت نیوز : ملی یکجہتی کونسل پاکستان کے مرکزی وفد نے کونسل کے سیکرٹری جنرل لیاقت بلوچ کی سربراہی میں پاکستان میں متعین ایران کے سفیر رضا امیری مقدم سے ملاقات کی۔
وفد میں ملی یکجہتی کونسل پاکستان کے مرکزی نائب صدور علامہ ڈاکٹر شبیر حسن میثمی، علامہ عارف حسین واحدی، محترم مفتی گلزار نعیمی، علامہ عارف حسین شیرازی، محترم نصر اللہ رندھاوا اور سیکرٹری مالیات طاہر رشید تنولی شامل تھے۔
وفد نے ایران پر اسرائیل کے ناپاک حملے کی مذمت کرتے ہوئے اسلامی ملک ایران کے خلاف اسرائیلی جارحیت کو عالمی قوانین کے خلاف ورزی قرار دیا اور سفیر ایران کو پاکستان کی امت مسلمہ کی جانب سے اپنی بھرپور حمایت کا یقین دلایا۔
وفد کے سربراہ اور اراکین نے ایران کی بصیرت افروز، مدبرانہ اور جراتمندانہ قیادت کو خراج تحسین پیش کیا اور اسرائیل پر جوابی حملوں کو عالمی قوانین اور ایک آزاد و خود مختار ملک کا دفاعی حق قرار دیا۔
عالم اسلام کی جانب سے ایران نے ہمیشہ فلسطینی مسلمانوں کی نہ صرف کھل کر حمایت کی بلکہ مقاومت کی تحاریک کو اخلاقی، سفارتی سطح پر سپورٹ بھی دی اور اسلامی اقدار کو ملحوظ خاطر رکھتے ہوئے اسرائیل کے قبلہ اول بیت المقدس پر ناجائز اور ناپاک قبضے کے خلاف ایک اسلامی ملک ہونے کے ناطے عالمی سطح پر کھل کر صدائے احتجاج بلند کی۔
یہ بھی پڑھیں : ایران اسرائیل جنگ میں امریکہ کی عسکری مداخلت کے نتائج برے ہونگے، اقوام متحدہ
انہوں نے ایران کے سپریم لیڈر آیت اللہ العظمی سید علی خامنہ ای کی صحت و سلامتی کے ساتھ ساتھ ایرانی قیادت کی حفاظت کی بھی دعا کی۔
اس موقع پر ایران کے سفیر رضا امیری مقدم نے ایران اسرائیل جنگ میں ایران کی حمایت پر ملی یکجہتی کونسل اور پاکستانی عوام کا شکریہ ادا کیا اور پاکستان کی عوام کی حمایت کو عالم اسلام کے درد مشترک کی مثال قرار دیا۔
انہوں نے پاکستان میں تمام اسلامی مکاتب فکر کے نمائندہ پلیٹ فارم کی ملی یکجہتی کونسل کی کاوشوں کو بھی خراج تحسین پیش کیا جس نے پاکستان کے مسلمانوں کو ایک امت کی لڑی میں پرو رکھا ہے۔
امت مسلمہ اسی مثالی اتحاد کے ذریعے دنیا و آخرت میں سرخروئی حاصل کر سکتی ہے اور ان کے بقول ملی یکجہتی کونسل پاکستان کا یہ کردار امت مسلمہ کے اتحاد کو نہ صرف مزید مستحکم بنائے گا بلکہ دنیا کے مسلمانوں کے لیے مثال ثابت ہوگا۔
اس موقع پر ملی یکجہتی کونسل پاکستان کے وفد نے اسرائیلی حملوں میں فلسطینی اور ایرانی شہدائے اسلام کی بلندی درجات کے لیے دعا کی جبکہ سوگوار خانوادوں سے تعزیت کا بھی اظہار کیا۔
