ایران نے خود ساختہ جدید ائیر ٹریفک ریڈار سسٹم کا افتتاح کردیا

شیعیت نیوز : ایران نے غیر منصفانہ پابندیوں کے باوجود ایوی ایشن کے شعبے میں اہم پیش رفت کرتے ہوئے ایک جدید ملکی ساختہ ایئر ٹریفک ریڈار سسٹم کا باضابطہ افتتاح کر دیا۔

ایرانی صدر مسعود پزشکیان نے ملک کے جنوب مغربی شہر آبادان کے ہوائی اڈے پر ریڈار سسٹم کی تنصیب کا حکم دیا۔

ایرانی وزارت ٹرانسپورٹ کے حکام کے مطابق یہ جدید ریڈار سسٹم علاقے میں ایئر ٹریفک کنٹرول نیٹ ورک کو مزید مستحکم کرے گا۔

ایران ایئرپورٹس اینڈ ایئر نیویگیشن کمپنی کے سی ای او محمد امیرانی نے بتایا کہ یہ سسٹم مکمل طور پر ایرانی کمپنیوں کے ذریعے ڈیزائن اور تیار کیا گیا ہے۔

اس منصوبے میں اصفہان یونیورسٹی آف ٹیکنالوجی کے سائنسدانوں نے بھی بھرپور تعاون کیا، اور یہ ریڈار 450 کلومیٹر کے دائرے میں اندرون و بیرون ملک پروازوں کی نگرانی کرنے کی صلاحیت رکھتا ہے۔

یہ بھی پڑھیں : شہید ابراہیم رئیسی کی صاحبزادی کی پاکستان آمد، لاہور میں کانفرنس سے خطاب کریں گی

امیرانی کے مطابق حکومت نے اس منصوبے پر 6 کروڑ یورو خرچ کیے۔

اس سسٹم کے فعال ہونے کے بعد درآمدی اخراجات میں دس لاکھ یورو کی بچت ہوگی۔

اس ریڈار سسٹم کا آغاز ملک کی ہوا بازی کی صنعت میں خود کفالت اور ترقی کی راہ میں ایک اہم سنگِ میل ہے۔

ایرانی ایوی ایشن اتھارٹیز نے 2024 کے آخر میں اعلان کیا تھا کہ ملک نے بوئنگ اور ایئربس طیاروں کے انجن پارٹس بنانے کی ٹیکنالوجی میں مہارت حاصل کرلی ہے۔