اصحاب بدر کا جذبہ آج کے مسلمانوں کے لیے نمونہ ہے، علامہ ساجد نقوی

شیعیت نیوز: علامہ سید ساجد علی نقوی نے فتح جنگ بدر (17 رمضان المبارک) کی مناسبت سے اپنے پیغام میں کہا ہے کہ غزوہ بدر توکل بر خدا اور رسالتِ مآبؐ کے احکام اور پالیسیوں پر صدق دل سے عمل کرنے کا واضح مظاہرہ ہے۔ انہوں نے کہا کہ اس سے سبق ملتا ہے کہ جس طرح اصحاب بدر نے کم تعداد اور وسائل کی کمی کے باوجود رسولِ خداؐ کے حکم کی اطاعت کی اور اپنے آپ کو قربانی کے لیے پیش کرنے میں کسی قسم کی ہچکچاہٹ محسوس نہیں کی، اسی طرح اگر آج کے مسلمان بھی سچے جذبے اور کامل ایمان کے ساتھ اسلام اور مسلمانوں کے دفاع کے لیے اصحاب بدر والا جذبہ پیدا کریں تو کوئی طاقت اسلام کا بال بیکا نہیں کر سکتی۔

یہ بھی پڑھیں: ایران میں چھٹی القدس کانگریس کا انعقاد، فلسطین کی آزادی پر مرکوز

علامہ ساجد نقوی نے مزید کہا کہ محافظِ رسالت حضرت علیؑ نے جس دلیری کے ساتھ سینہ سپر ہو کر کفار اور دشمنوں کو واصلِ جہنم کیا، یہ جذبہ ہر مجاہد اور حریت پسند کے لیے نمونہ عمل ہے۔ اتحاد بین المسلمین کی افادیت و ضرورت پر زور دیتے ہوئے انہوں نے کہا کہ تمام مسلمانوں کو ایک دوسرے کی مشکلات میں ساتھ دینا چاہیے۔ انہوں نے کہا کہ سامراج اور صہیونیت کو تقویت مل رہی ہے، ہمیں اُمتِ مسلمہ کو مضبوط بنانا ہے۔