ایران کے ساتھ دشمنی مغرب کو کوئی فائدہ نہیں دے گی، بلاول بھٹو زرداری

شیعیت نیوز: پاکستان پیپلز پارٹی کے چیئر مین اور سابق وزیر خارجہ بلاول بھٹو زرداری نے منگل کو میونخ سیکورٹی کانفرنس کے موقع پر ایک انٹرویو میں امریکی حکومت کے ساتھ پاکستان کے روابط کے مستقبل، افغانستان کی صورتحال اور مشرق وسطی کے حالات پر گفتگو کی۔

پاکستان کے سابق وزیر خارجہ بلاول بھٹو زرداری نے اس انٹرویو میں کہا کہ پاکستان کو درپیش موجودہ مسائل کا ایران سے کوئی تعلق نہیں ہے بلکہ ان کا تعلق افغانستان سے امریکا کے چلے جانے سے ہے، جس کے نتیجے میں دہشت گرد گروہوں کی سرگرمیاں بڑھ گئی ہیں۔

انہوں نے کہا کہ ٹی ٹی پی، داعش، اور علیحدگی پسند باغی گروہ سقوط کابل سے قبل پاکستان کی فوجی کارروائیوں کے نتیجے میں کمزور ہوگئے تھے لیکن امریکا اور نیٹو کے افغانستان سے نکل جانے کے بعد وہ دوبارہ فعال ہوگئے۔

یہ بھی پڑھیں: علامہ شفقت حسین شیرازی کی نجف میں آیت اللہ بشیر حسین نجفی سے اہم ملاقات

پیپلز پارٹی کے چیئر مین نے اسی طرح کہا کہ ایران کے ساتھ مغرب کے تنازعے سے بھی علاقے پر منفی اثرات مرتب ہوئے ہیں۔ انہوں نے کہا کہ مغرب اور ایران کے تنازعے کے نتیجے میں ہم اقتصادی معاملات انجام نہیں دے پا رہے ہیں اور اس کے نتیجے میں ہمیں بے روزگاری اور غربت بڑھنے کا سامنا ہے۔ بلاول بھٹو زرداری نے خبردار کیا کہ اسلامی جمہوریہ ایران کے ساتھ کشیدگی سے مغرب کو کوئی فائدہ نہیں ہوگا۔

انہوں نے اسی کے ساتھ، جنوبی ایشیا میں امریکا کے دوہرے رویے کے منفی نتائج اور طاقت کے توازن بگڑ جانے کی بابت خبردار کرتے ہوئے کہا کہ اسلام آباد بیجنگ اور واشنگٹن کے درمیان رابطہ پل کا کردار ادا کرسکتا ہے۔