قطر کی عدالت میں سزائے موت پانے والے بھارت کے 8 سابق افسران کی اپیل منظور، سماعت جلد متوقع

شیعیت نیوز: قطر کی عدالت نے ہندوستانی بحریہ کے 8 سابق افسران کی اپیل کو قبول کر لیا ہے اور اس معاملے میں جلد سماعت ہوگی۔

دہلی سے موصولہ رپورٹ کے مطابق 27 اکتوبر 2023 کو قطر کی عدالت نے بھارتی بحریہ کے 8 سابق افسران کو سزائے موت سنائی تھی۔

اب اس سلسلے میں اہم پیش رفت ہوئی ہے اور قطر کی عدالت نے حکومت ہندوستان کی طرف سے دائر کی گئی اپیل منظور کرلی ہے اور جلد ہی اس کیس کی سماعت ہونے کی توقع ہے۔

یہ بھی پڑھیں : دہلی میں واقع افغان سفارت خانے کو مستقل طور پر بند کردیا گیا

اطلاعات کے مطابق قطر کی ایک عدالت نے جمعرات (23 نومبر) کو اپیل کی دستاویزات قبول کر لیں۔ عدالت فی الحال اپیل کا مطالعہ کر رہی ہے۔

سزائے موت پانے والے بھارتی بحریہ کے ان سابق افسران پر مبینہ طور پر اسرائیل کے لیے جاسوسی کا الزام ہے۔

قطر کی نیوز ویب سائٹ الجزیرہ کی رپورٹ کے مطابق ان افسران پر قطر کی آبدوز کے منصوبے سے متعلق معلومات اسرائیل کو دینے کا الزام ہے۔

یہ بھی پڑھیں : غزہ میں عارضی جنگ بندی، اسرائیل کے جرائم کے سد باب کی سمت پہلا قدم، ناصر کنعانی

بھارتی بحریہ سے سبک دوش یہ تمام افسران دوحہ میں قائم الدہرہ کمپنی میں کام کرتے تھے۔ یہ کمپنی ٹیکنالوجی اور مشاورتی خدمات فراہم کرتی تھی۔

مذکورہ کمپنی عمان کی فضائیہ سے ریٹائرڈ اسکواڈرن لیڈر خامس العجمی چلا رہے تھے۔ پچھلے سال بھارتی افسران کے ساتھ خامس العجمی کو بھی گرفتار کیا گیا تھا تاہم انہیں نومبر میں ضمانت پر رہا کردیا گیا۔