اقوامِ متحدہ کے سیکریٹری جنرل کی غزہ کے اسپتال پر حملے کی مذمت
شیعیت نیوز: اقوامِ متحدہ کے سیکریٹری جنرل انتونیو گوتریش نے غزہ کے اسپتال پر حملے کی مذمت کی ہے۔
انتونیو گوتریش نے کہا ہے کہ غزہ کے اسپتال پر حملے میں سیکڑوں فلسطینیوں کی ہلاکت سے بہت دہشت زدہ ہوں۔
اسرائیلی جارحیت کے بعد انہوں نے اپنے بیان میں کہا ہے کہ میرا دل متاثرین کے اہلِ خانہ کے ساتھ ہے۔
اقوام متحدہ کے سیکریٹری جنرل انتونیو گوتریش کا یہ بھی کہنا ہے کہ اسپتالوں اور طبی عملے کو بین الاقوامی انسانی قانون کے تحت تحفظ حاصل ہے۔
واضح رہے کہ غزہ کے الاہلی اسپتال پر اسرائیلی طیاروں نے بمباری کی ہے جس کے نتیجے میں 800 سے زائد فلسطینی شہید ہوگئے ہیں، بمباری سے اسپتال کی عمارت مکمل طور پر تباہ ہوگئی ہے۔
یہ بھی پڑھیں : کربلائے غزہ میں اسرائیلی بربریت :غزہ کے ہسپتال پر حملہ میں500فلسطینی شہید
دوسری جانب اقوام متحدہ کے سیکریٹری جنرل انٹونیو گوترش نے صیہونی حکومت سے کہا ہے کہ وہ غزہ کے عوام تک انسان دوستانہ امداد کی رسائی میں رکاوٹ نہ بنے۔
گوترش نے پیر کی صبح کو کہا کہ اقوام متحدہ کے پاس مصر، اردن ، غرب اردن اور اسرائیل میں خوراک ، پانی، طبی وسائل اور ایندھن موجود ہے کہ جسے وہ چند گھنٹوں میں ارسال کرسکتا ہے، لیکن اس کے لئے ضروری ہے کہ ہمارے کارکنوں کو ان امدادی سامانوں کی غزہ کے عوام کے درمیان تقسیم میں کوئی رکاوٹ نہ ہو اور ان کو مکمل سیکورٹی دی جائے۔
صیہونی حکومت کہ جسے گزشتہ دنوں میں فلسطینی مزاحمت کے ہاتھوں میدان جنگ میں عبرتناک اور ذلت آمیز شکست نصیب ہوئی ہے، غزہ کی تمام گزرگاہوں کو ایک غیر انسانی اقدام کے ساتھ بند کر دیا تاکہ طوفان الاقصی کارروائی میں فلسطینی مجاہدین کو جرات مندانہ آپریشن کو روکنے پر مجبور کیا جا سکے۔
اقوام متحدہ، انٹرنیشنل کمیٹی آف ریڈ کراس اور ورلڈ فوڈ پروگرام کے ماہرین نے غزہ کی پٹی میں شہریوں پر اسرائیلی فوج کے وحشیانہ حملوں کو ’اجتماعی سزا‘ کی واضح مثال قرار دیتے ہوئے متنبہ کیا ہے کہ انسانی صورت حال مزید سنگین ہوسکتی ہے۔
اقوام متحدہ کے دفتر برائے رابطہ برائے انسانی امور (او سی ایچ اے) نے اعلان کیا ہے کہ غزہ کی پٹی کے ہسپتالوں کے لیے ایندھن کے ذخائر چوبیس گھنٹوں میں ختم ہوجائیں گے۔
