لاپتہ افراد کیس ، چیف جسٹس سپریم کورٹ پر اسیکیوٹر جنرل سندھ پر برہم

شیعیت نیوز: لاپتہ افراد کیس ، چیف جسٹس سپریم کورٹ جسٹس قاضی فائز عیسیٰ پراسیکیوٹر جنرل سندھ فیض ایچ شاہ پر شدید برہم ۔سپریم کورٹ کراچی رجسٹری میں لاپتہ افراد کیس کی سماعت کے دوران لاپتہ افراد کیس میں ایف آئی آر درج کرنے پر پراسیکیوشن کی اپیل، جسٹس قاضی فائز عیسیٰ پراسیکیوٹر جنرل سندھ فیض ایچ شاہ پر شدید برہم ۔جسٹس قاضی فائز عیسیٰ نے کہا کہ کیا یہ پولیس اسٹیٹ ہے؟ آئین اور قانون کی دھجیاں بکھیرنا بند کریں، آئین اور قانون کو مذاق بنا رکھا ہے، کیا آپ شہریوں کو لاپتہ کرنے والوں کی سہولت کاری کر رہے ہیں؟

جواب میں پراسیکیوٹر جنرل سندھ فیض ایچ شاہ نے کہا کہ جی ایسا نہیں،جسٹس قاضی فائز عیسیٰ نے ٹوکتے ہوئےکہا کہ بالکل ایسا ہی ہے، آپ سہولت کاری کا کام کر رہے ہیں، جسٹس یحییٰ آفریدی نے کہا کہ دکھ ہوا ریاست ایک ایف آر درج ہونے کے خلاف عدالت آئی ہے۔

جسٹس قاضی فائز عیسیٰ نے کہا کہ آپ کا کام کیا ملزموں کو تحفظ دینا ہے؟ کیا آپ ایس ایچ او ہیں جو ایف آئی آر درج کرنے نہ کرنے کا فیصلہ کریں گے؟

یہ بھی پڑھیں: قومی ہیرو محافظ معمارانِ قوم شہید اعتزاز حسن کی ساتویں برسی خاموشی سے گذر گئی، حکومت سوتی رہ گئی

محمد اقبال پٹیل نے کہا کہ میرے بھائی محمد ندیم پٹیل کو سی ٹی ڈی انچارج راجہ عمر خطاب نے اغوا کیا، سندھ ہائی کورٹ نے راجہ عمر خطاب کے خلاف ایف آئی آر کا حکم دیا۔

جسٹس قاضی فائز عیسیٰ نے پراسیکیوٹرجنرل سے استفسارکیا کہ بتائیں، آپ نے کس حیثیت میں یہ اپیل دائر کی؟ کیا راجہ عمر خطاب اتنا طاقتور ہے کہ آپ کے ادارے کو چلا رہا ہے؟ راجہ عمر خطاب کے بجائے آپ کو اپیل کی ضرورت کیوں پیش آئی، آپ کو ایس ایچ او کے اختیارات کب سے مل گئے؟

جسٹس یحییٰ آفریدی نے ریمارکس دیئے کہ دکھ ہوا کہ ریاست ایک ایف آئی آر کے خلاف اپیل کر رہی ہے،کم از کم اتنا تو حق دیں کہ نام شامل ہوسکے کہ کس نے اغوا کیا، ایف آئی آر غلط درج ہو تو کٹوانے والے کے خلاف آپ کا حق ہے۔

یہ بھی پڑھیں: سلیوٹ۔۔۔۔۔۔شہید اعتزاز حسن ـــ| سچ بات؛ارشاد حسین ناصر

پراسیکیوٹر جنرل فیض ایچ شاہ نے کہا کہ ایف آئی آر درج ہو جائے تو ہمیں اب کوئی اعتراض نہیں،جسٹس قاضی فائز عیسیٰ نے کہاکہ ایف آئی آر درج کرکے کسی پر احسان کیا کیا؟ کیا احسان کر رہے ہیں یہ کرکے، آپ کی ذمہ داری ہے یہ، یہ کون سا طریقہ ہے، جو مرضی آئے وہ کریں، کس قانون کے تحت آپ نے یہ فیصلہ کیا؟

عدالت نے پراسیکیوٹر جنرل سندھ سے اپیل دائر کرنے پر وضاحت طلب کرلی ۔پراسیکیوٹر جنرل سندھ کو پیر کو وضاحت کے ساتھ دوبارہ پیش ہونے کی ہدایت۔