توقع ہے کہ ایران عالم اسلام کے اتحاد کیلئےمرکزی کردار اداکرتےہوئےامت کی ترجمانی کرےگا،سراج الحق

شیعیت نیوز: جماعت اسلامی پاکستان کے امیر سراج الحق نے کہا کہ ہم توقع رکھتے ہیں کہ ایران عالم اسلام کے اتحاد کے لئے مرکزی کردار اور پوری امت کی ترجمانی کرے گا۔ مولانا مودودی کا تعلق امام خمینیؒ کے ساتھ اسلامی اور انقلابی فکر کی بنیاد پر تھا۔ ان خیالات کا اظہار انہوں نے اسلام آباد میں اسلامی جمہوریہ ایران کے سفیر سید محمد علی حسینی سے ملاقات کے دوران کیا۔

ملاقات ایک گھنٹہ جاری رہی۔ ایرانی سفیر نے سراج الحق کو اسلامی اتحاد، امن، عالم اسلام میں تقسیم اور تنازعات سے گریز کے موضوع پر بین الاقوامی کانفرنس میں شرکت کی دعوت دی۔

یہ بھی پڑھیں: طالبہ کے ساتھ زیادتی کے جرم میں گرفتار سعودی ریالوں پر پلنے والا مفتی شاہ نواز بھی ٹھوس ثبوتوں کے باوجود عدالت سے رہا

افغانستان کی صورت حال پر بات کرتے ہوئے امیر جماعت اسلامی نے کہا کہ افغانستان میں گذشتہ چالیس سال سے جو خون بہہ رہا ہے، وہ اب بند ہونا چاہیئے، تاکہ وہاں کے عوام معمول کی زندگی گزار سکیں۔ ہمارا خیال ہے کہ اس مرتبہ طالبان کے رویئے میں تبدیلی آئی ہے۔ اگر ایران اور پاکستان نے مل کر کردار ادا نہ کیا تو دشمن ممالک حالات کو خراب کرنے کی سازش کرسکتے ہیں اور افغانستان میں عدم استحکام کا پورے خطے کو نقصان ہوگا۔