صیہونی حکومت کے خلاف جامع مزاحمت پر غور کررہے ہیں، ابو مرزوق

شیعیت نیوز: اسلامی مزاحمتی تحریک حماس کے سیاسی بیورو کے رکن موسیٰ ابو مرزوق نے کہا ہے کہ قابض اسرائیل کے خلاف ایک جامع مزاحمت اور محاذ آرائی کا آپشن ابھی تک فلسطینی مزاحمتی دھڑوں کی میز پر موجود ہے۔

ابو مرزوق نے پیر کی شام ایک انٹرایکٹو میٹنگ کے دوران ’’ھاور فورم فار اسٹڈیز اینڈ ڈیموکریٹک ڈائیلاگ‘‘ میں گفتگو کرتے ہوئے کہا کہ فلسطینی قوتیں قابض دشمن کے خلاف ملک کے اندر تمام شہروں میں جامع مزاحمت اور محاذ آرائی پر غور کررہی ہیں۔

حماس رہنما نے کہا کہ کسی بھی خطے میں قابض طاقت کے خلاف مظلوم لوگوں کی طرف سے  فطری طور پر مزاحمت کی جاتی ہے اور فلسطینیوں کو اپنے حقوق کے حصول کے لیے ہرسطح پر مزاحمت اور جدو جہد کا حق ہے۔

انہوں نے مزید کہا کہ ہمارے فلسطینی عوام ہر جگہ ہیں۔ انہیں ایک حقیقی تحریک میں آگے بڑھنا چاہیے اورفتح کے حصول کے لیے قربانیاں دینا ہوں گی ۔

یہ بھی پڑھیں : قابض اسرائیلی فوج کی ریاستی دہشت گردی میں فلسطینی لڑکا شہید

سعودی حکام کے ساتھ تعلقات کے بارے میں ابو مرزوق نے کہا کہ سعودی عرب کی طرف سے حماس کے ساتھ تعلقات ختم کرنے میں ہمارا کوئی کردار نہیں۔ ہم قیدیوں کی رہائی کے لیے کوشش کر رہے ہیں  اور ہمیں امید ہے کہ مملکت اس کا جواب دے گی۔ دانش  کا مظاہرہ کرتے ہوئے فلسطینی قیدیوں کو جلد رہا کرے گی۔

ابو مرزوق نے اس بات کی نشاندہی کی کہ افغان طالبان کی تحریک کے ساتھ رابطہ "طالبان کی” سیاسی تحریک کے ساتھ ہے اورحماس طالبان کو قومی آزادی کی تحریک سمجھتی ہے۔

دوسری جانب اسرائیلی فوج نے ایک فلسطینی تاجر کو شمالی غزہ کی پٹی میں بیت حانون (ایریز) کراسنگ سے اس وقت گرفتار کیا جب وہ مقبوضہ مغربی کنارے کی طرف جا رہا تھا۔

فلسطینی کراسنگ اینڈ بارڈرز اتھارٹی کے ایک عہدیدار نے قدس پریس کو بتایا بیت حانون/ایریز کراسنگ پر قابض افواج نے 31 سالہ تاجر حسن محبس الشرافی کو گرفتار کیا۔ اس کا تعلق شمالی غزہ کی پٹی میں جبالیہ پناہ گزین کیمپ سے ہے۔

انہوں نے مزید کہا کہ گرفتار تاجر کے خاندان کو قابض صیہونی فوج نے اس کی حراست سے آگاہ کیا تھا۔