ملک دشمن قوتوں کا حملہ ، سبی میں ناصرعباس سمیت 5ایف سی اہلکار شہید
شہید ظفر علی خان، ہدایت اللّٰہ اور نور اللّٰہ کا تعلق لکی مروت سے ہے، شہید ناصر عباس کا تعلق بھکر سے جبکہ شہید بشیر احمد کا تعلق نصیر آباد سے ہے۔
شیعیت نیوز: بلوچستان کے ضلع سبی کے علاقے سنگن میں ملک دشمن امریکی ، سعودی وبھارتی نواز دہشت گردوں نے فرنٹیئر کور کی پیٹرولنگ پارٹی پر حملہ کر دیا جس کے دوران 2 طرفہ فائرنگ کے تبادلے میں ایف سی کے 5 جوان شہید ہو گئے۔
پاک فوج کے شعبہ تعلقاتِ عامہ (آئی ایس پی آر) کے مطابق جوابی فائرنگ کے نتیجے میں دہشت گردوں کو بھاری نقصان پہنچا ہے، علاقے میں سرچ آپریشن جاری ہے۔ آئی ایس پی آر نے بتایا کہ دہشت گردوں کی فائرنگ سے فرنٹیئر کور (ایف سی) کے حوالدار ظفر علی خان، لانس نائیک ہدایت اللّٰہ، عباس، بشیر احمد اور سپاہی نور اللّٰہ شہید ہوئے ہیں۔ شہید ظفر علی خان، ہدایت اللّٰہ اور نور اللّٰہ کا تعلق لکی مروت سے ہے، شہید ناصر عباس کا تعلق بھکر سے جبکہ شہید بشیر احمد کا تعلق نصیر آباد سے ہے۔
یہ بھی پڑھیں: نیا سرکاری یکساں نصابِ تعلیم آئین کے متصادم اور قائد اعظم کے اصولوں کے بر خلاف ہے،آئی ایس او پاکستان
آئی ایس پی آر کے مطابق چند عناصر دشمن انٹیلی جنس ایجنسیوں کی مدد سے بزدلانہ کارروائیاں کر رہے ہیں، بلوچستان کا امن ایسے عناصر کے ہاتھوں سبوتاژ نہیں ہونے دیں گے۔ پاک فوج کے شعبہ تعلقاتِ عامہ (آئی ایس پی آر) کا یہ بھی کہنا ہے کہ سکیورٹی فورسز جان کی قربانی دے کر دشمنوں کے عزائم ناکام بنائیں گی۔
واضح رہے کہ وزیر اعظم پاکستان عمران خان کے امریکہ کو فوجی اڈے نا دینے کے فیصلے کے بعد پاکستان میں دہشت گرد کارروائیوں میں تیزی سے اضافہ دیکھنے میں آرہا ہے ۔
