ایم ڈبلیوایم نے یکم اگست کو وفاقی دار الحکومت اسلام آباد میں بڑے عوامی اجتماع کا اعلان کردیا

شیعیت نیوز: مجلس وحدت مسلمین پاکستان یکم اگست کو شہید قائد عارف حسین الحسینی کی تینتیسویں برسی کا شایان شان طریقے سے انعقاد کرے گی۔ایم ڈبلیو ایم کے مرکزی رہنما اور کانفرنس کوآرڈینیٹر نثار فیضی کی زیر صدارت ایک اہم اجلاس ایم ڈبلیو ایم کے مرکزی دفتر اسلام آباد میں منعقد ہوا۔

اجلاس سے خطاب کرتے ہوئے انہوں نے کہا کہ زندہ قومیں اپنے محسنوں کو کبھی فراموش نہیں کرتیں۔ شہید قائد وہ عظیم رہنما تھے جنہوں نے اپنی قوم کی بہترین فکری رہنمائی کی۔ انہوں نے وحدت و اخوت کا جس موثر انداز سے پرچار کیا اس کی مثال نہیں ملتی۔

یہ بھی پڑھیں:بدکردار درندوں کو دینی مدارس سے بے دخل کرکے ان سے مفتی اور مولانا کی سند اور القابات واپس لئے جائیں، علامہ مقصود ڈومکی

انہوں نے کہا کہ مجلس وحدت مسلمین اپنے اس عظیم قائد کو خراج عقیدت پیش کرنے کے لیے ہر سال وفاقی دارالحکومت میں عالیشان تقریب کا انعقاد کرتی ہے۔گزشتہ سالوں کی طرح امسال بھی ایک بھرپور تقریب کا انعقاد کیا جائے گا جس میں ملک کے تمام صوبوں سے مختلف مکاتب فکر کے علماء ،کارکنان اور معروف مذہبی، سیاسی ، سماجی اور صحافتی شخصیات شریک ہوں گی۔

انہوں نے مرکزی رہنماؤں کو شہید قائد کی برسی کے سلسلے میں فوری طور پر رابطوں کا آغاز کرنے کی ہدایات کیں ہیں۔