امریکہ نے افغانستان میں صرف تباہی اور بربادی مچائی، حامد کرزائی
شیعیت نیوز: افغانستان کے سابق صدر حامد کرزائی نے افغانستان سے امریکی فوج کے انخلا کی طرف اشارہ کرتے ہوئے کہا ہے کہ امریکہ 20 سال پوری طاقت کے ساتھ یہاں رہنے کے باوجود اپنے مقاصد حاصل نہیں کرسکا اور ناکام واپس لوٹ رہا ہے۔
عالمی خبر رساں ادارے ’’اے پی‘‘ کو دیئے گئے انٹرویو میں افغانستان کے سابق صدر حامد کرزائی نے افغانستان سے امریکی فوجیوں کے انخلا اور اس کے بعد پیدا ہونے والی صورت حال پر کھل کر اپنے تحفظات اور خدشات کا اظہار کیا۔
افغانستان کے سابق صدر نے کہا کہ دہشت گردی کے خاتمے اور استحکام کا ہدف لے کر افغانستان آنے والا امریکہ 20 سال بعد بھی اپنے مقاصد حاصل کرنے میں ناکام رہا ہے اور اس نے صرف دہشت گردی کو فروغ دیا ۔
یہ بھی پڑھیں : غیر ملکی افواج کے انخلاء کے بعد طالبان کے پاس طاقت کے استعمال کا کوئی جواز نہیں، ایران
حامد کرزائی نے مزید کہا کہ افغانستان سے واپس جانے والی امریکی فوج نے اپنی میراث میں صرف تباہی ، شرمندگی اور بربادی چھوڑی ہے تاہم اچھی بات یہ ہے کہ افغان عوام اب متحد ہیں اور امن کی خواہش رکھنے والے افغانیوں کو اپنے مستقبل کی ذمہ داری خود اُٹھانا چاہیے۔
افغان صدر نے کہا کہ افغان عوام امریکی فوج کی موجودگی کے بغیر ہی بہتر تھے۔ غیر ملکی فوجیوں کی موجودگی نے ہمیں وہی کچھ دیا ہے جو اس وقت ہمارے پاس ہے اس لیے افغانستان کے لیے بہتر ہے کہ امریکی فوجی واپس چلے جائیں۔
واضح رہے کہ 2001ء میں امریکہ کے افغانستان پر حملے اور طالبان حکومت کے خاتمے کے بعد حامد کرزئی اقتدار میں آئے تھے، وہ 2014ء تک اس عہدے پر فائز رہے، جس کے دوران لڑکیوں نے دوبارہ اسکول جانا شروع کیا اور خواتین نے قومی منظر نامے میں اپنا کردار نبھایا، جبکہ متعدد متحرک سول سوسائٹی بھی وجود میں آئیں۔
