معرکہ سیف القدس نے ثابت کردیا کہ مسجد اقصیٰ ہماری اور القدس سرخ لکیر ہے، اسماعیل ھنیہ

شیعیت نیوز: اسلامی مزاحمتی تحریک حماس کے سیاسی شعبے کے سربراہ اسماعیل ھنیہ نے کہا ہے کہ معرکہ سیف القدس میں فلسطینی قوم نے ایک بار پھرثابت کیا ہے کہ قبلہ اول (مسجد اقصیٰ)  ہماری اور القدس سرخ لکیر ہے۔

کل جمعہ کے روز ایک بیان میں اسماعیل ھنیہ نے کہا کہ آج فلسطینی قوم کی قابض اور غاصب دشمن پر فتح کا دن ہے۔ 11  روز تک جاری رہنے والی لڑائی کو ہم نے ’’معرکہ سیف القدس‘‘ کا نام دیا۔ آج ہم فتح مند اور دشمن شرمناک شکست سے دوچار ہے۔ ہمارے دل خوشی سے سرشار ہیں۔ آج پوری مسلم دنیا، فلسطینی قوم اور دنیا کے زندہ ضمیر لوگ خوش ہیں۔ دنیا فلسطینی قوم کی بہادری کی پیروی کررہی ہے۔فلسطینی قوم نے جس بہادری  اور ثابت قدمی کے ساتھ دشمن کا مقابلہ کیا ہے اس نے پوری فلسطینی قوم کا سر فخر سے بلند کردیا ہے۔

انہوں نے کہا کہ فلسطین کی مزاحمتی قیادت کو القدس کی فتح اور مسریٰ رسول صلی اللہ علیہ وسلم کے دفاع کی توفیق بخشی۔

یہ بھی پڑھیں : رہبر انقلاب اسلامی آیت اللہ خامنہ ای کا ۱۲ روزہ مقاومت میں شاندار کامیابی پر ملت فلسطین اور امت مسلمہ کے نام تہنیتی پیغام

ان کا کہنا تھا کہ ہم اس وقت اس عظیم فتح اور کامیابی پر اللہ کی حمد وثنا بیان کرتے ہیں۔ اس وقت فلسطینی قوم، مسلم امہ ایک نئے دور میں داخل ہو رہے ہیں۔ القدس اور الاقصیٰ کی آزادی کا مرحلہ بھی ایک نئے دور میں داخل ہوچکا ہے۔

اسماعیل ھنیہ نے کہا کہ غزہ کی پٹی کےعوام نے القدس، الاقصیٰ اور پوری فلسطینی قوم کی طرف سے قابض اسرائیلی ریاست ک مقابلہ کرتے ہوئے پوری مسلم امہ کی طرف سے قربانی پیش کی ہے۔

انہوں نے غزہ کی پٹی کے محاذ پر قابض صیہونی فوج کی ریاستی دہشت گردی کا مقابلہ کرنے والی فلسطینی مزاحمتی قوتوں کو فتح پرمبارک باد پیش کی۔

یہ بھی پڑھیں : پاکستان مردہ باد اسرائیل و فلسطین زندہ باد کے نعروں سے گونج اٹھا

اسماعیل ھنیہ کا کہنا تھا کہ اسرائیل نے ایک بار پھر فلسطینی مزاحمتی قیادت کی استقامت اور ثابت قدمی کا امتحان لیا ہے جس میں فلسطینی قوم سرخرو نکلی ہے۔ اسرائیلی دشمن کوایک بار پھر اندازہ ہوگیا ہے کہ غزہ کی پٹی دشمن کے لیے تر نوالہ نہیں بن سکتی۔

فلسطینی قیادت نے معرکہ سیف القدس میں دشمن کے زیرتسلط آخری شہروں کو بھی نشانہ بنا کر یہ پیغام دیا ہے کہ فلسطینی مزاحمتی تحریک اور دفاعی صلاحیت پہلے کی نسبت بہتر ہوئی ہے۔

انہوں نے اسلامی جہاد اور حماس کے شہید ہونے والے کمانڈروں باسم عیسیٰ او ڈاکٹر جمال الزبدہ کی خدمات اور ان کی قربانیوں کو خراج عقیدت پیش کیا۔

اسماعیل ھنیہ نے فلسطینی قوم پر مسلط کی گئی اسرائیلی جارحیت کے خلاف اور فلسطینی قوم کا ساتھ دینے پر مسلم امہ کا شکریہ ادا کیا۔

انہوں نے عالمی برادری، مسلم ممالک اور عرب ممالک پر زور دیا کہ وہ غزہ کی پٹی میں اسرائیلی ریاست کے ہاتھوں ہونے والی تباہ کاری کے بعد تعمیر نو کے لیے اپنا کردار ادا کریں۔