بحر احمر میں ایرانی بحری جہاز پر سمندری بارودی سرنگوں کے ذریعے حملہ

شیعیت نیوز: ایرانی ذرائع نے جہاز پر حملے کی تصدیق کرتے ہوئے اعلان کیا ہے کہ یہ حملہ سمندری بارودی سرنگوں کے ذریعے کیا گیا ہے۔ اس ایرانی بحری جہاز کا نام SAVIZ ہے جس کو بحر احمر میں نشانہ بنایا گیا۔

نیویارک ٹائمز نے اسے اسرائیلی حملہ قرار دیا ہے۔ امریکی اخبار کے مطابق ، صیہونی حکومت نے جہاز کو پہلے نشانہ بنانا تھا لیکن ایک امریکی طیارہ بردار بحری جہاز کی سوویز کے نزدیک ہونے کے سبب تل ابیب نے ’’ڈوائٹ آئزن ہاور‘‘ کی روانگی تک اپنا آپریشن مؤخر کردیا تھا۔

ایک امریکی عہدے دار کا کہنا ہے کہ اسرائیلی فورسز نے گذشتہ روز مقامی وقت کے مطابق صبح 7:30 بجے بحر احمر میں ایرانی جہاز SAVIZ کو نشانہ بنایا ہے۔

یہ بھی پڑھیں : ویانا کے مذاکرات تعمیری تھے، اگلی نشست جمعے کو ہوگی، ایرانی ایٹمی مذاکرات کار

دوسری طرف بحر احمر میں ایرانی بحری جہازکے واقعے سے متعلق سوال کے جواب میں امریکی محکمہ دفاع (پینٹاگون) کے ترجمان نے دعویٰ کیا ہے کہ انہیں اس بارے میں معلومات نہیں ہیں۔

ایران کی وزارت امور خارجہ کے ترجمان خطیب زادے نے بحیرہ احمر میں ایرانی بحری جہاز پر حملے کی خبر کے بارے میں ایک رپورٹر کے سوال کا جواب دیتے ہوئے کہا ہے کہ منگل 6 اپریل کو مقامی وقت کے مطابق صبح 6 بج کر 30 منٹ پر جبوتی کے ساحل سے نزدیک بحر احمر میں ایک دھماکے میں ایرانی تجارتی جہاز ساویز کو قدرے نقصان پہنچا ہے جبکہ ہم اس حادثہ کے بارے میں تحقیقات کر رہے ہیں۔

خطیب زادہ نے مزید کہا ہے کہ خوش قسمتی سے اس حادثے کے نتیجے میں کسی جانی نقصان کی اطلاع موصول نہیں ہوئی۔ ہم اس سلسلے میں بین الاقوامی اداروں کے ذریعے تمام ضروری اقدامات انجام دیں گے۔

یہ بھی پڑھیں : شام کی سرزمین پر حزب اللہ کی موجودگی نہایت ضروری ہے، روس

دوسری جانب ایران نے غیرملکی خفیہ اداروں سے رابطے میں رہنے والے ایک اسرائیلی جاسوس سمیت متعدد دوسرے افراد کو گرفتار کیا ہے تاہم گرفتار افراد کی شہریت نہیں بتائی گئی۔

خبر رساں ایجنسی رائٹرز کے مطابق وزارت انٹیلی جنس نے کہا کہ ایک اسرائیلی جاسوس کو ایران کے مشرقی صوبے آذربائیجان سے گرفتار کیا گیا ہے اور اسرائیلی جاسوس اور اس کے ساتھیوں کے کئی ممالک کی خفیہ ایجنسیوں سے رابطے تھے۔

اسرائیلی حکام نے مبینہ طور پر جاسوسی کے الزام پر کوئی تبصرہ نہیں کیا۔